सिल्लोड : मटण घेऊन दुचाकीवरून जाणाऱ्या शेतकऱ्यावर बिबट्याने हल्ला करून नरडीचा घोट घेतल्याची खळबळजनक घटना घडली आहे. ही (ता. रेलगाव) येथील मानकाई देवी डोंगर परिसरात घटना रविवारी (ता. १) रोजी रात्री साडेनऊ ते दहा वाजेच्या सुमारास घडली आहे.
रवी अंबादास काजले असे मृत्यू झालेल्या व्यक्तीचे नाव आहे.
मिळालेल्या माहिती नुसार, शेतकरी रवी काजले व त्यांच्या मित्रांनी नववर्षानिमित्त शेतात मटणाची पार्टी करण्याचे नियोजन केले. त्यानुसार रवी काजले हे बोकडाचे मटण घेऊन रविवारी (ता.१ ) रात्री साडेनऊ वाजेच्या सुमारास दुचाकीवरून एकटे निघाले होते.
यावेळी त्यांच्या दुचाकीवर बिबट्याने हल्ला केला. यात खाली पडलेल्या रवी काजले यांचा गळा बिबट्याने जबड्यात धरून त्यांच्या नरडीचा घोट घेतला. पाठीमागून रवी यांचे मित्र आल्यानंतर त्यांना रवी यांची मोटारसायकल रस्त्याच्या बाजूला पडलेली दिसली.
दरम्यान, त्यांनी थांबून पाहणी केली असता, रवी काजले हे रक्ताच्या थारोळ्यात पडलेले दिसले. त्यांनी तात्काळ ही बाब गावात व पोलिसांना कळविली. या घटनेमुळे गावात दहशत पसरली असून शेतकऱ्यांमध्ये भीतीचे वातावरण पसरले आहे. घटनेची माहिती मिळताच वनविभागाचे पथक घटनास्थळी रवाना झाले.
