पुणे : पत्नी व मुलासोबत (wife and son) घरी निघालेल्या दुचाकीस्वाराला अडवून त्याला हत्याराच्या धाकाने लुटण्यात आल्याचा धक्कादायक प्रकार घडला. पैसे न मिळाल्याने दोघांनी त्यांच्या गाडीची तोडफोड केली. रात्री सव्वा आकराच्या सुमारास ही घटना वारजेतील केटीएम शोरूमजवळ घडली. या घटनेनंतर परिसरात भीतीचे वातावरण पसरले आहे.
याप्रकरणी वारजे माळवाडी पोलीस ठाण्यात २६ वर्षीय व्यक्तीने तक्रार दिली आहे. त्यावरून दोन अनोळखी व्यक्तीविरोधात गुन्हा दाखल करण्यात आला आहे.
मिळालेल्या माहितीनुसार, तक्रारदार हे वारजे माळवाडीतील नवग्रह मारूती मंदिर येथील परिसरात राहतात. ते शुक्रवारी रात्री सव्वा आकराच्या सुमारास पत्नी व मुलाला घेऊन दुचाकीने निघाले होते. ते केटीएम शो रूमजवळ आल्यानंतर पाठिमागून आलेल्या दुचाकीवरील चोरट्यांनी त्यांना दुचाकी थांबविण्यास सांगितली. तसेच, त्यांना पैसे दे म्हणून धमकावले.
दरम्यान, धारधार हत्याराने त्यांना धमकावत जबरदस्तीने लुटण्याचा प्रयत्न केला. पण, त्यांच्याकडे पैसे न मिळाल्याने त्यांनी शिवीगाळ करत त्यांच्या गाडीची काच फोडून नुकसान केले. पुढील तपास पोलीस करत आहेत.
