पुणे : अन्नधान्याचा पुरवठा करण्याचे आमिष दाखवून इंदापूरातील एका व्यापाऱ्याची तब्बल २४ लाखांची फसवणूक केल्याची धक्कादायक घटना नुकतीच उघडकीस आली आहे. याप्रकरणी भारती विद्यापीठ पोलीस ठाण्यात ४ जणांवर गुन्हा दाखल करण्यात आला आहे.
सुशीलकुमार त्रिवेदी, वंदना दायमा, भारत दायमा आणि राणी दायमा अशी गुन्हा दाखल झालेल्यांची नावे आहेत. याप्रकरणी सचिन निवृत्ती नरुटे (वय ३०, रा. काझड, इंदापूर, जि. पुणे) यांनी भारती विद्यापीठ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, नरुटे यांचे इंदापूर परिसरात एक किराणा दुकान आहे. आरोपींनी त्यांना अन्नधान्याचा पुरवठा करण्याचे आमिष दाखवून त्यांच्याकडून ऑनलाइन पद्धतीने २४ लाख ९ हजार रुपये घेतले होते. पैसे दिल्यानंतर आरोपींनी नरुटे यांना अन्नधान्याचा पुरवठा केला नाही.
दर्म्म्यान, नरुटे यांनी आरोपींकडे विचारणा केली असता, वरील चारही आरोपींनी उडवाउडवीची उत्तरे दिली. नरुटे यांना आपली फसवणूक झाल्याचे लक्षात आल्यानंतर त्यांनी त्वरित भारती विद्यापीठ पोलिसांकडे तक्रार दिली. त्यानुसार चार जणांवर गुन्हा दाखल करण्यात आला आहे. तरी, पुढील तपास भारती विद्यापीठ पोलिस ठाण्याचे सहायक पोलीस निरीक्षक पाटील करीत आहेत.
