पुणे : क्रिप्टोमध्ये गुंतवणुकीच्या बहाण्याने एका व्यक्तीची १४ लाख ४८ हजारांची ऑनलाइन फसवणूक करण्यात आल्याची घटना हिंजवडी परिसरात घडली आहे. याप्रकरणी हिंजवडी पोलिसांनी ८ जणांवर गुन्हे दाखल केले आहेत.
अभिषेक कमलकुमार माथूर (वय ४३, रा. मारुंजी) यांनी याप्रकरणी हिंजवडी पोलिस ठाण्यात फिर्याद दिली आहे. त्यानुसार पोलिसांनी मोबाईल क्रमांक धारक, बनावट वेबसाइट धारक, टेलिग्राम आयडी धारक, युपीआय आयडी धारक, बँक खाते धारक अशा आठ जणांवर गुन्हा दाखल केला आहे.
पोलिसांनी दिलेल्या माहितीनुसार, अभिषेक माथुर यांना एका व्हाट्सअप क्रमांकावरून मेसेज आला. समोरील व्यक्तीने माथूर यांना टेलिग्राम ग्रुपमध्ये घेतले.
तिथे त्यांना क्रिप्टो अकाउंट सुरु करण्यास सांगून ऑनलाइन पैसे भरण्यास सांगितले. त्यानुसार माथूर यांनी १४ लाख ४८ हजार ९०० रुपये क्रिप्टो करन्सीमध्ये ऑनलाइन गुंतवणूक केली.
दरम्यान, गुंतवणूक करताच त्यांच्या क्रिप्टो अकाउंटला २८ लाख ८० हजार रुपये जमा झाल्याचे दिसले. त्यानंतर माथूर यांनी जमा झालेल्या रकमेपैकी काही रक्कम काढण्याचा प्रयत्न केला. मात्र त्यांना पैसे काढता आले नाहीत.
आपली फसवणूक झाल्याचे लक्षात येताच माथूर यांनी पोलिसात धाव घेतली. तपास हिंजवडी पोलीस करीत आहेत.
