मध्य प्रदेश : मध्यप्रदेशातील रीवा येथे राष्ट्रीय महामार्गावर बस व ट्रक यांच्यात झालेल्या भिषण अपघातात १४ जणांचा जागेवरच मृत्यू झाला आहे. तर ४० हून अधिक प्रवासी गंभीर जखमी झाले आहेत. अपघाताची माहिती मिळताच पोलीस आणि बचाव पथक तात्काळ घटनास्थळी दाखल असून जखमींना रुग्णालयात दाखल करण्यात आले आहे.
मिळालेल्या माहितीनुसार, ही बस रीवा येथून इलाहाबादकडे जात होती. उत्तरप्रदेशचे असलेले हे प्रवाशी दिवाळीच्या सुट्ट्यांनिमित्त घरी परतत होते. रात्री राष्ट्रीय महामार्ग ३० वर ट्रेलरचा गाडीशी अपघात झाला. त्यामुळे अनेक वाहने महामार्गावर उभी होती. त्यातच मागून जोरात येणाऱ्या बसने महामार्गावर उभा असलेल्या ट्रकला धडक दिली. ही धडक एवढी जोरदार होती की, बसच्या समोर बसलेल्या सर्व प्रवाशांचा मृत्यू झाला आहे.
दरम्यान, बससमध्ये शंभरपेक्षा अधिक प्रवाशी होते. अपघाताची माहिती मिळताच पोलीस आयुक्त, जिल्हाधिकारी घटनास्थळी दाखल झाले. किरकोळ जखमी असलेल्या प्रवाशांना सार्वजनिक रुग्णालयात दाखल करण्यात आलं. तर, गंभीर जखमी असलेल्या प्रवाशांना रीवा येथील संजय गांधी रुग्णालयात दाखल केले आहे.
