शिरुर : तर्डोबाची वाडी (ता. शिरूर) येथील ग्रामपंचायत हद्दीतील जांभळी मळाजवळील गट क्रमांक १११३ मधील १० चंदनाची झाडे चोरून नेली आहेत. या झाडांची किंमत अंदाजे २५ हजार रुपये इतकी आहे. ही घटना मंगळवारी (ता. २८ फेब्रुवारी) ते बुधवारी (ता.१ मार्च) या कालावधीत घडली आहे. यापूर्वी देखील चंदनाची झाडे चोरीचे प्रकार या भागात झाले आहेत.
याप्रकरणी संतोष बबनराव मोरे (वय-४४) या शेतकऱ्याने शिरुर पोलिस ठाण्यात तक्रार दिली आहे. त्यानुसार अज्ञात चोरट्यांच्या विरोधात गुन्हा दाखल करण्यात आला आहे.
मिळालेल्या माहितीनुसार, तर्डोबाची वाडी ग्रामपंचायत हद्दीतील जांभळी मळाजवळ १० चंदनाची झाडे होती. अज्ञात चोरट्यांनी अंधाराचा फायदा घेत बुडापासून कापून चंदनाची झाडे चोरून नेली आहेत. बुधवारी सकाळी शेतात गेल्यावर हा चोरीचा प्रकार उघडकीस आला आहे. पुढील तपास शिरुर पोलिस ठाण्याचे पोलिस निरीक्षक सुरेशकुमार राऊत यांच्या मार्गदर्शनाखाली पोलिस नाईक कोथाळकर करीत आहेत.
