पुणे : शस्त्राचा धाक दाखवून दहशत निर्माण करणे, दरोडे टाकणे, पिस्टल जवळ बाळगणे, गावठी हातभट्टीची दारू विक्री करणे अशा गंभीर गुन्ह्यांमध्ये सहभागी असलेल्या लोणी काळभोर, कोंढवा आणि वानवडीतील 10 गुन्हेगारांना पोलीस उपायुक्त डॉ. राजकुमार शिंदे यांनी दोन वर्षांसाठी तडीपार करण्याचा आदेश दिला आहे.
कोंढवा परिसरातील टोळी प्रमुख करीम सय्यदअली सौदागर ऊर्फ लाला (वय 29, रा. मेट्रो टॉवर, कोंढवा खुर्द) याच्यासह शाहरुम रमजान पठाण ऊर्फ फतेह (वय 25, रा. भाग्योदयनगर, कोंढवा), अझहर बशीर शेख (वय 35, रा. शिवनेरीनगर, कोंढवा) आणि अझहर इरफान शेख ऊर्फ अज्जु (वय 28, रा. भाग्योदयनगर, कोंढवा) या टोळीतील सदस्यांवर बेकायदा हत्यार जवळ बाळगणे, दुखापत करणे, मारहाण करणे, धमकावणे, जबरी चोरी, सार्वजनिक मालमत्तेचे नुकसान, चोरी अशा स्वरूपाचे एकूण 7 गुन्हे दाखल आहेत. या चौघांना दोन वर्षांसाठी पुणे शहर, पिंपरी-चिंचवड आणि पुणे जिल्ह्यातून तडीपार करण्यात आले आहे.
वानवडीतील टोळी प्रमुख राहुल ऊर्फ विकी रामु परदेशी (वय 35, रा. वानवडी गाव), विशाल राजू सोनकर (वय 26, रा. वानवडी गाव), सुनिल रामु परदेशी (वय 30, रा. वानवडी गाव) यांच्यावरही दुखापत करणे, मारहाण करणे, शिवीगाळ करणे, धमकावणे, सरकारी कामात अडथळा निर्माण करणे, गंभीर दुखापत करणे आणि बेकायदा हत्यार जवळ बाळगणे असे सात गुन्हे दाखल आहेत. या तिघांनाही दोन वर्षांसाठी तडीपार करण्यात आले आहे.
लोणी काळभोर परिसरातील अनिकेत गुलाब यादव (वय 22, रा. कदमवाकवस्ती, लोणी काळभोर) याच्यावर बेकायदेशीर जमाव जमवणे, शस्त्र बाळगून दहशत निर्माण करणे, दरोडा टाकणे, मारहाण करून धमकावणे, जबरी चोरी करणे आणि बेकायदेशीर अग्निशस्त्र जवळ बाळगणे अशा पाच गुन्ह्यांची नोंद आहे.
त्याचप्रमाणे, लोणी काळभोरमधील प्रसाद ऊर्फ बाबु धनाजी सोनवणे (वय 21, रा. नायगाव रोड, थेऊर) याच्यावर बेकायदेशीर हत्यार जवळ बाळगणे आणि दरोड्याची तयारी करणे असे तीन गुन्हे आहेत.
दरम्यान, कोंढवा खुर्दमधील विश्वजीत भिमराव गायकवाड (वय 40, रा. भिमनगर, कोंढवा खुर्द) याच्यावर बेकायदेशीर गावठी हातभट्टीची दारू विक्री करण्याचे चार गुन्हे दाखल असून त्यालाही दोन वर्षांसाठी तडीपार करण्यात आले आहे. पोलिसांच्या या कारवाईमुळे संबंधित भागातील नागरिकांना काही प्रमाणात दिलासा मिळणार असल्याची प्रतिक्रिया व्यक्त होत आहे.
