पुणे : पुणे जिल्ह्यातील उत्तर कोरेगावामध्ये एक संतापजनक घटना समोर आली आहे. एका मैत्रिणीनेच दुसऱ्या मैत्रिणीला प्रेमाच्या खोट्या जाळ्यात ओढलं. मैत्रिणीने तरुणाच्या नावाने इन्स्टाग्रामवर बनावट खातं तयार करून अनेक दिवस तिने आपल्या मैत्रिणीसोबत तरुणाच्या नावाने चॅटिंग केली. परंतु जेव्हा समोरच्या मैत्रिणीने तिला भेटण्याची इच्छा व्यक्त केली. तेव्हा वडिलांच्या नावाने मॅसेज पाठवून त्या तरुणाचा मृत्यू झाल्याचा खोटा बनाव देखील रचला.
मुलासोबत चॅटिंग करत आहोत या भ्रमात असणारी तरुणी या घटनेनंतर नैराश्यात गेली. इतके दिवस झाले ज्याच्यासोबत प्रेमाच्या गोष्टी केल्या. ज्याला न बघता जीवापाड प्रेम केलं तोच या जगात राहिला नाही. असं समजून तिने गळफास घेऊन आत्महत्या केली. या घटनेची पोलिसांनी दखल घेत तरुणाचं बनावट अकाउंट बनवून मैत्रिणीला फसवणाऱ्या तरुणीवर गुन्हा दाखल करण्यात आला आहे.
मिळालेल्या माहितीनुसार, पुणे जिल्ह्यातील उत्तर कोरेगाव परिसरात असलेल्या अल्ल्याड-पल्ल्याड या गावात राहणाऱ्या एका तरुणीने थट्टा मस्करीत इन्स्टाग्रामवर मनीष पाटील या नावाने बनावट अकाउंट तयार करून तिने या अकाउंटवरुन आपल्या मैत्रिणीला मेसेज केले. तसेच तिला प्रेमाच्या जाळ्यात देखील ओढलं.
मनीषला भेटण्याची इच्छा केली व्यक्त आणि..
अनेक दिवसांच्या चॅटिंगनंतर या तरुणीने मनीषला भेटण्याची इच्छा व्यक्त केली. आता आपलं सर्व नाटक उघडं पडणार या भीतीने तरुणीने आणखी एक इन्स्टाग्राम अकाउंट ओपन केलं. त्यावरून मी मनीषचे वडील बोलतोय. नुकतेच त्याचे निधन झाले असून तो या जगात नाहीये, असा मॅसेज केला. मनीषच्या प्रेमात पडलेली ही मुलगी खूपच निराश झाली. एकदाही न भेटलेल्या या मुलीला मनीष आपल्याला सोडून गेला आहे. तो या जगात नाही. हे दु:ख सहनच झाले नाही. त्यामुळे या मुलीने तिच्या राहत्या घरी गळफास घेत आत्महत्या केली आहे. मुलीच्या कुटुंबियांनी याबाबत पोलिसांत गुन्हा नोंद केला असून पोलिसांकडून आत्महत्येचा शोध सुरू आहे.
असा लागला गुन्ह्याचा शोध..
पोलिसांनी आत्महत्या केलेल्या मुलीचा फोन चेक केल्यानंतर या मुलीचे मनीष पाटील आणि शिवम पाटील यांच्याशी केलेले इन्स्टाग्राम चॅट समोर आले आहेत. यानंतर पोलिसांनी मनीष आणि शिवम या व्यक्तींचा शोध घेतला असता हे बनावट अकाऊंट्स असल्याचे पोलिसांच्या निदर्शनास आले. यानंतर हे दोन्ही अकाऊंट कोणाचे आहेत? हे तपासण्यासाठी पोलिसांना मोबाईल नंबर ट्रॅक केला तर हा नंबर तिच्या जिवलग मैत्रिणीचा असल्याचे उघड झाले. त्यानंतर पोलिसांनी मैत्रिणीला अटक केली आहे.
