अकोला : आगामी विधानसभा निवडणुकांच्या पार्श्वभूमीवर राज्यात सर्वच पक्ष जोरदार तयारीला लागले असून आरोप प्रत्यारोपही बघायला मिळत आहेत. अशातच आता राष्ट्रवादी काँग्रेस अजित पवार गटाचे प्रवक्ते अमोल मिटकरी यांच्या विरोधात मनसे कार्यकर्ते आक्रमक झाल्याचं दिसून येत आहे. अमोल मिटकरी यांची गाडी मनसे कार्यकर्त्यांनी फोडल्याची माहिती समोर येत आहे. दरम्यान, अमोल मिटकरींनी राज ठाकरे यांंच्यावर टीका केल्याने मनसैनिक आक्रमक झाले असल्याचं बोललं जात आहे.
अजित पवार गटाचे नेते अमोल मिटकरी यांनी मनसेप्रमुख राज ठाकरे यांचा उल्लेख सुपारीबाज असा केला होता, त्यानंतर त्यांच्या गाडीची तोडफोड करण्यात आली आहे. अकोल्यात हा प्रकार घडला. राज ठाकरे यांच्याविषयीच्या टिप्पणीमुळे संतप्त झालेल्या मनसैनिकांनी अमोल मिटकरी यांच्यावर हल्ला करण्याचा प्रयत्न केला. मात्र, हा प्रयत्न यशस्वी झाला नाही. मनसे कार्यकर्त्यांच्या हल्ल्यात अमोल मिटकरी यांच्या गाडीच्या काचा फुटल्या असून या घटनेनंतर मनसे आणि अजित पवार गटातील संघर्ष आणखी तीव्र होण्याची शक्यता दिसत आहे.
अशा हल्ल्यांना आम्ही भिक घालत नाही..
अमोल मिटकरी यांनी मनसेकडून झालेल्या हल्ल्याबाबत प्रतिक्रिया दिली आहे. अशा हल्ल्यांना आम्ही भिक घालत नाही, महायुतीत असं करुन सत्तेत येऊ शकतो, असं वाटत असेल तर तसं होणार नाही, असं मिटकरी म्हणाले. पुढे बोलताना अमोल मिटकरी म्हणाले की, “अकोल्यातली शासकीय विश्रामगृहाच्या बाहेर हा प्रकार घडला. मनसेचे कार्यकर्ते शासकीय विश्रामगृहाच्या बाहेर उभे होते. त्यांनी माझ्यावर हल्ला करण्याचा प्रयत्न केला. पण असे मागून हल्ले करुन काही होणार नाही, ते नपूसंक लोक आहेत. अशी गुंडगिरी महाराष्ट्रात चालणार नाही. मी याप्रकरणी पोलीस अधिक्षकांकडे तक्रार केली आहे, असे अमोल मिटकरी यांनी सांगितले.”
नेमकं प्रकरण काय?
राज ठाकरे यांनी सोमवारी पुण्यातील पत्रकार परिषदेमध्ये अजित पवार यांना लक्ष्य केले होते. पुण्यातील मुसळधार पावसाबाबत राज ठाकरे यांनी खोचक टिप्पणी केली होती. अजित पवार पुण्यात नसूनही पुण्यातील धरणं भरली, असे राज ठाकरे यांनी म्हटले होते. यानंतर प्रतिउत्तर दाते अमोल मिटकरी यांनी राज ठाकरेंवर तिखट भाषेत टीका केली होती. अमोल मिटकरी यांनी राज ठाकरे यांचा उल्लेख थेट सुपारीबाज असा केला होता. टोल आणि भोंग्याचे आंदोलन फसलेल्या सुपारीबहाद्दरांनी अजित पवारांवर बोलू नये.
हे सुपारी बहाद्दर टोल नाक्याचे आंदोलन असेल, भोंग्याचे आंदोलन असेल किंवा आणखी कुठले आंदोलन असेल त्यांना जीवनात कुठल्याही आंदोलनाला यश आले नाही. राज ठाकरेंना एनडीआरएफचा साधा लाँग फॉर्मही सांगता आला नाही म्हणजे राजकारणातील हा सर्वात मोठा जोक आहे. राज ठाकरे या व्यक्तीची विश्वासार्हता संपली आहे. महाराष्ट्रातील आतापर्यंतच्या राजकीय इतिहासात सर्वात अयशस्वी ठरलेल्या व्यक्तींनी अजितदादांच्या कार्यकर्तुत्वावर प्रश्नचिन्ह उपस्थित करणे म्हणजे हे सूर्याला वाकुल्या दाखवण्यासारखा आहे, असा अमोल मिटकरी यांनी राज ठाकरे यांच्यावर हल्लाबोल केला होता.
