पिंपरी-चिंचवड : सध्या सोशल मीडियावर रिल्स बनवून प्रसिद्ध होणाऱ्यांची संख्या दिवसेंदिवस वाढतच आहे. काहीतरी स्टंट किंवा हुल्लडबाजी करुन प्रसिद्ध होण्याचं फॅड वाढत असून असाच एक स्टंट तरूणांना चांगलाच भोवला आहे. पिंपरी-चिंचवडमध्ये हवेत पिस्तूल उंचावून रिल्स बनवणाऱ्या तरुणांना रील करण्याचा प्रताप चांगलाच भोवला आहे.
पिंपरी- चिंचवडच्या खंडणी विरोधी पथकाने भरधाव दुचाकीवर हातात पिस्तुल घेऊन रिल्स बनवणाऱ्या दोघांना अटक केली आहे. दहशत पसरविण्यासाठी हे कृत्य केल्याचं समोर आलं आहे. व्हायरल होणा-या व्हिडिओमधून एकाच्या हातात पिस्तुल असल्याचे स्पष्ट दिसत आहे. हा व्हिडीओ कधीचा आहे हे समजू शकलेल नाही. सध्या व्हिडिओ सोशल मीडियावर व्हायरल होतो आहे.
पिंपरी- चिंचवड शहरातील रस्त्यांवर दुचाकीवर हातात पिस्तुल घेऊन ते हवेत उंचावून रिल्स काढत असल्याचा व्हिडिओ समोर आला आहे. या प्रकरणी कुणाल रमेश साठे याला अटक करण्यात आली आहे. तर एक अल्पवयीन मुलाला ताब्यात घेतलं आहे. तसेच यश कांबळे, सुशील बारक्या आणि रोहित मिश्रा यांच्यावर गुन्हा दाखल करण्यात आला आहे.
व्हायरल होणा-या व्हिडिओमध्ये यश कांबळे हा दुचाकीवर पाठीमागे पिस्तुल हवेत उंचावत आहे. त्याचा व्हिडिओ पाठीमागे असलेल्या दुचाकीवरील तरुणांनी मोबाईलमध्ये काढला आहे. या प्रकरणी तातडीने दोघांना अटक करण्यात आली आहे. आरोपींवर चिखली पोलीस ठाण्यात गुन्हा दाखल करण्यात आला आहे. पिस्तुल बनावट आहे की खरं याबाबत पोलीस तपास करत आहेत. या प्रकरणी अद्याप मुख्य आरोपीचा शोध पोलीस घेत असून आरोपी पिस्तुलासह फरार आहे.
