नाशिक: शिवसेना शिंदे गटाच्या माजी महिला पदाधिकारी लक्ष्मी ताठे यांना तेलंगणा पोलिसांनी अटक केली आहे. नाशिकमधील पंचवटी परिसरातून नाशिक पोलिसांच्या मदतीने तेलंगणा पोलिसांनी लक्ष्मी ताठे यांना ताब्यात घेतले. तेलंगाणामधील दामेरा पोलीस ठाण्याच्या हद्दीत 8 जून रोजी 190 किलो गांजा पकडण्यात आला होता. याप्रकरणी ताठे यांना अटक करण्यात आली आहे. तेलंगाणा अंमली पदार्थ विरोधी पथकाने ही कारवाई केली. दरम्यान या प्रकरणात बीड आणि अहमदनगरमधील दोन तस्करांना अटक करण्यात आली होती. तपासादरम्यान लक्ष्मी ताठे यांचे नाव पुढे आल्याने एक महिन्यानंतर तेलंगाणा पोलिसांनी त्यांना अटक केली आहे.
शिवसेना शिंदे गटाकडून स्पष्टीकरण
लक्ष्मी ताठेंना तेलंगणा पोलिसांनी अटक केल्यानंतर शिवसेनेने स्पष्टीकरण दिले आहे. लक्ष्मी ताठे यांची या आधीच शिवसेना पक्षातून हकालपट्टी करण्यात आली आहे. त्यांचा आणि शिवसेनेचा काहीही संबंध नाही, असं शिंदे गटाकडून सांगितले जात आहे.
