बेळगाव : पुणे-बंगळुरू महामार्गावरील बेळगाव जिल्ह्यात एका कंटनेर वाहनाचा विचित्र अपघात झाला आहे. या अपघातात कंटेनरचालक आणि ट्रकमधील ड्रायव्हर यांना गंभीर दुखापत झाली असून दोघांचेही पाय तुटल्याची प्राथमिक माहिती समोर आली आहे. ही घटना ४ जून रोजी दुपारच्या सुमारास पुणे-बंगलोर राष्ट्रीय महामार्गावर हलगा गावाजवळ घडली.
याबाबत अधिक माहिती अशी की, कंटेनर चालकाचे नियंत्रण सुटल्याने डिव्हायडरवरून दुसऱ्या बाजूला कंटेनर जाऊन अपघात झाला. डिव्हायडरच्या बाजुला असलेल्या ट्रकला कंटेनरची धडक बसली. या घटनेत ट्रकच्या केबिनचा चक्काचूर झाला असून दोन्ही वाहनांचे चालक गंभीर जखमी झाले आहेत. या भीषण अपघातात दोन्ही चालकांचे पाय तुटल्याची प्राथमिक माहिती मिळत आहे.
घटनेची माहिती मिळताच पोलीस व प्रशासनाने घटनास्थळी धाव घेत स्थानिकांच्या मदतीने दोन्ही वाहन चालकांना गाडीतून बाहेर काढले. त्यानंतर उपचारासाठी जिल्हा रुग्णालयात दाखल करण्यात आले. रस्त्यावर उभ्या असलेल्या ट्रकमधे दोन प्रवासी होते, ते देखील किरकोळ जखमी झाले आहेत.
