पालघर : पालघरमध्ये दुचाकी आणि रिक्षाची समोरासमोर जोरदार धडक होऊन भीषण अपघात झाला. या अपघातामध्ये एका शाळकरी विद्यार्थिनीचा मृत्यू झाला, तर ६ जण गंभीर जखमी झाले आहेत. जखमींवर रुग्णालयात उपचार सुरू आहेत.
ही घटना आज सकाळी सकाळी ११ वाजण्याच्या सुमारास डहाणू-जव्हार मार्गावर घडली. संगीता सुभाष डोकफोडे (१४-वर्षे) असं या अपघातामध्ये मृत्यू झालेल्या विद्यार्थिनीचे नाव आहे. हा अपघात इतका भीषण होता की यामध्ये रिक्षाचा चक्काचूर झाला आहे.
याबाबत मिळालेल्या माहितीनुसार, संगीता वांगर्जे येथून सूर्यानगरला शाळेत जात असताना डहाणू-जव्हार मार्गावर वरोतीजवळ बाईक आणि रिक्षाची समोरासमोर जोरदार धडक झाली. या अपघातात आठवीत शिकणाऱ्या विद्यार्थिनीचा जागीच मृत्यू झाला. या अपघातामध्ये ६ जण गंभीर जखमी झाल्याची प्राथमिक माहिती मिळत आहे.
अपघाताची माहिती मिळताच पालघर पोलिसांनी घटनास्थळी धाव घेतली. जखमी झालेल्या सर्वांना तात्काळ कासा उपजिल्हा रुग्णालयात उपचारासाठी दाखल केले आहे. जखमींमधील अनेकांची प्रकृती गंभीर असल्याने त्यांना पुढील उपचारासाठी धुंदलवाडी येथील वेदांत हॉस्पिटलमध्ये हलविण्यात आले आहे. प्रवासी उतरत असल्याने रिक्षा रस्त्याच्या कडेला थांबली होती. तेवढ्यात या रिक्षाला दुचाकीने जोरदार धडक दिल्याने रिक्षा पलटी झाली.
