लोणी काळभोर : पुणे-सोलापूर राष्ट्रीय महामार्गावरून गावी निघालेल्या 23 वर्षीय तरुणाची दुचाकी अडवत धक्काबुक्की करून लुटल्याची धक्कादायक घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील माळी मळा परिसरात असलेल्या एस.के. बिर्याणी हॉटेल समोर घडली आहे. याप्रकरणी एका 23 वर्षीय तरुणाने (रा. देऊळगाव राजे, ता. दौंड) यांनी लोणी काळभोर पोलीस ठाण्यात फिर्याद दिली आहे. त्यानुसार दोन अज्ञात चोरट्यांविरोधात गुन्हा दाखल करण्यात आला आहे.
लोणी काळभोर पोलिसांनी दिलेल्या माहितीनुसार, फिर्यादी हे पुणे-सोलापूर राष्ट्रीय महामार्गावरून त्यांच्या गावी देऊळगाव राजे येथे दुचाकीवरून शुक्रवारी (ता.24) सकाळी आठ वाजण्याच्या सुमारास निघाले होते. त्यांची दुचाकी माळी मळा परिसरात असता अज्ञात दोघांनी त्यांना अडवले. त्यानंतर त्यांना धक्काबुक्की करत त्यांच्या पँन्टच्या खिशातून साडेबारा हजार रुपये आणि सातशे रुपयांचे स्मार्ट वॉच जबरदस्तीने चोरून नेले.
दरम्यान, या प्रकरणी एका तरुणाने लोणी काळभोर पोलीस ठाण्यात फिर्याद दिली आहे. त्यानुसार दोन चोरट्यांविरोधात जबरी चोरीचा गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण यांच्या मार्गदर्शनाखाली पोलीस उपनिरीक्षक अमोल घोडके करीत आहेत.
