मुंबई: चेन्नई सुपर किंग्स आणि रॉयल चॅलेंजर्स बंगळुरू यांनी रविवारी डबल हेडरमध्ये विजय नोंदवून प्लेऑफ शर्यतीला रोमांचक वळणावर नेले. 62 सामन्यांनंतर आतापर्यंत केवळ एकाच संघाला (कोलकाता नाईट रायडर्स) प्लेऑफचे तिकीट मिळू शकले आहे. अशा स्थितीत उर्वरित तीन जागांसाठी सात संघांमध्ये लढत सुरू आहे. 12 मे रोजी आरसीबीने दिल्लीविरुद्ध विजय मिळवून त्यांच्या प्लेऑफच्या आशा जिवंत ठेवल्या. चाहत्यांना हे जाणून घ्यायचे आहे की, सीएसके आणि आरसीबी दोघेही प्लेऑफमध्ये पोहोचू शकतात का?
आरसीबीला शेवटचा सामना जिंकावा लागेल
आरसीबी सध्या गुणतालिकेत 12 गुणांसह पाचव्या स्थानावर आहे. 18 मे रोजी गटातील शेवटच्या सामन्यात आरसीबीचा सामना सीएसकेशी होणार आहे. डुप्लेसिसच्या संघाने प्रथम फलंदाजी करताना चेन्नईला हरवले तर त्यांची धावगती सीएसकेपेक्षा चांगली असेल. याशिवाय त्यांच्या खात्यात 14 गुण असतील. याशिवाय बेंगळुरूला सनरायझर्स हैदराबाद आणि लखनऊ सुपर जायंट्स यांच्या सामन्यांवरही अवलंबून राहावे लागणार आहे. जर केएल राहुलच्या संघाने दोन सामन्यांपैकी फक्त एकच जिंकला आणि दिल्ली-गुजरातची धावगती कमकुवत राहिली, तर शनिवारी आरसीबी-चेन्नई यांच्यात चुरशीचा सामना पाहायला मिळेल.
प्लेऑफपासून एक पाऊल दूर
चेन्नई 13 सामन्यांत सात विजयांसह गुणतालिकेत तिसऱ्या स्थानावर आहे. संघाच्या खात्यात 14 गुण आहेत. चेन्नईला शेवटचा सामना बेंगळुरूविरुद्ध खेळायचा आहे. गायकवाडच्या संघाने हा सामना जिंकल्यास ते प्लेऑफसाठी पात्र ठरतील. त्याचबरोबर सामना हरल्यास त्यांना नेट रनरेटवर अवलंबून राहावे लागेल.
बेंगळुरू-चेन्नईसाठी टॉप 4 मध्ये येण्यासाठी काय समीकरणे आहेत?
आरसीबीने त्यांच्या पुढील सामन्यात सीएसकेला थोड्या फरकाने पराभूत केले तर त्यांचे 14 गुण होतील. या स्थितीत सीएसकेच्या नेट रन रेटवर फारसा परिणाम होणार नाही. 14 मे रोजी लखनऊचा सामना दिल्लीशी तर 17 मे रोजी मुंबई इंडियन्सशी होणार आहे. दिल्लीने लखनऊला हरवले तर त्यांच्या खात्यात १४ गुण होतील. जर हैदराबादने आपले दोन्ही सामने गमवाले, तर या स्थितीत हैदराबाद केवळ 14 गुणांवर थांबेल. या परिस्थितीत, आरसीबी आणि सीएसके 14 गुणांसह आणि चांगल्या नेट रनरेटमुळे टॉप-4 मध्ये असतील. त्याचवेळी, लखनऊ आणि हैदराबादचे प्रत्येकी 14 गुण असतील, परंतु त्यांची धावगती चेन्नई आणि बेंगळुरूच्या तुलनेत जास्त नसेल.
