नवी दिल्ली: लोकसभा निवडणुकीसाठी मतदानाचा पहिला टप्पा सुरू होण्यापूर्वीच सर्वसामान्यांना मोठी भेट मिळाली आहे. सरकारी तेल आणि गॅस मार्केटिंग कंपन्यांनी सोमवार एक एप्रिलपासून एलपीजी सिलिंडरच्या किमती कमी करण्याची घोषणा केली आहे. यामुळे जनतेला काहीसा दिलासा मिळेल, अशी अपेक्षा आहे.
व्यावसायिक सिलिंडरवर कपात लागू
सरकारी तेल कंपन्यांनी दिलेल्या माहितीनुसार, आजपासून म्हणजेच सोमवार एक एप्रिलपासून देशातील विविध शहरांमध्ये एलपीजी सिलिंडरच्या किंमतीत 30.50 रुपयांपर्यंत कपात करण्यात आली आहे. मात्र, या दर कपातीचा लाभ फक्त 19 किलोच्या व्यावसायिक एलपीजी सिलिंडरवरच मिळणार आहे. घरगुती वापराच्या एलपीजी सिलिंडरच्या किमतीत गॅस दरांमध्ये कोणताही बदल केलेला नाही.
आजपासून विविध शहरांमध्ये या किमती
ताज्या कपातीनंतर दिल्लीत 19 किलोच्या सिलेंडरची किंमत 1,764.50 रुपयांवर आली आहे. त्याचप्रमाणे कोलकातामध्ये आजपासून व्यावसायिक एलपीजी सिलिंडर 1,879 रुपयांना उपलब्ध होणार आहेत. या मोठ्या सिलिंडरसाठी मुंबईतील लोकांना आता 1,717.50 रुपये मोजावे लागतील, तर चेन्नईमध्ये त्याची किंमत आता 1,930 रुपये असेल.
निवडणुकीपूर्वी दरांमध्ये कपात
व्यावसायिक सिलिंडरच्या किमतीतील ही कपात महत्त्वाची ठरते, कारण याच महिन्यात पहिल्या टप्प्याचे मतदान होणार आहे. देशात सात टप्प्यांत होणाऱ्या लोकसभा निवडणुका एप्रिल महिन्यात सुरू होणार असून जूनपर्यंत चालणार आहेत. यासोबतच गेल्या तीन महिन्यांपासून सलग सुरू असलेली व्यावसायिक सिलिंडरची दरवाढही थांबली आहे.
गेल्या महिन्याच्या सुरुवातीला, महिला दिनानिमित्त (8 मार्च 2024) पंतप्रधान नरेंद्र मोदी यांनी एलपीजी सिलिंडरच्या किमतीत 100 रुपयांची सूट जाहीर केली होती, तेव्हा घरगुती एलपीजी सिलिंडर ग्राहकांना एक भेट मिळाली होती. त्याच्या एक दिवस आधी म्हणजे 7 मार्चला मोदी सरकारने एलपीजी सिलिंडरच्या बाबतीत सर्वसामान्यांना दिलासा दिला होता. त्यानंतर केंद्रीय मंत्रिमंडळाने 31 मार्च 2025 पर्यंत पंतप्रधान उज्ज्वला योजनेच्या लाभार्थ्यांना 300 रुपये सबसिडी देण्याची घोषणा केली होती.
