मुंबई : पुणे-मुंबई एक्स्प्रेस वेवर तीन वाहनांचा भीषण अपघात झाला. या अपघातात दुधाच्या टँकरचा चालक ठार झाला. अपघातामुळे टँकरमधील दूध रस्त्यावर पसरले. रविवारी दुपारच्या सुमारास हा अपघात झाला. या अपघातात कारचा चक्काचूर झाला. सुदैवाने कारमधील दोघे जण बचावले.
याबाबत मिळालेल्या अधिक माहितीनुसार, पुण्याहून मुंबईकडे दूध टँकर जात असताना खोपोली हद्दीत बोर घाट उतरताना टँकर चालकाने लेन बदलली. यामुळे टँकर अचानक कलंडले व कारवर आदळले. त्यानंतर ट्रकला जोरदार धडक दिली. यामुळे टॅंकरमधील दूध रस्त्यावर सांडले. अपघातग्रस्त वाहनांमुळे या मार्गावरील वाहतूक बंद करण्यात आली.
दरम्यान, अपघाताची माहिती कळताच घटनास्थळी खोपोली पोलीस, महामार्ग पोलीस, आयआरबी यंत्रणा तत्काळ पोहोचली. त्यांनी जखमींना जवळच्या रुग्णालयात दाखल केले. महामार्ग पोलिसांनी वाहतूक सुरुळीत केली. टँकर रस्त्याच्या बाजूला हलवल्यानंतर रस्ता वाहतुकीसाठी मोकळा झाला.
