पुणे : रेल्वे प्रवासादरम्यान आरक्षित वातानुकूलित कोचमधून महिला प्रवाशाची पर्स चोरीला गेल्याने त्रुटीयुक्त सेवा दिल्याबद्दल मध्य रेल्वेला ग्राहक आयोगाने दणका दिला. या चोरीमुळे आर्थिक फटका बसलेल्या प्रवाशाला ५ लाख १२ हजार ७०० रुपये वार्षिक सहा टक्के व्याजासहत परत करण्याचा आदेश आयोगाने रेल्वेचे विभागीय रेल्वे व्यवस्थापक आणि मनमाड स्थानक प्रमुखांना दिले आहेत.
पुण्याच्या अतिरिक्त जिल्हा ग्राहक आयोगाचे अध्यक्ष जे. व्ही. देशमुख, सदस्य शुभांगी दुनाखे आणि अनिल जवळेकर यांनी हा निकाल दिला. या प्रकारामुळे प्रवाशाला झालेल्या मानसिक त्रासापोटी २५ हजार रुपये भरपाई आणि तक्रार खर्चापोटी तीन हजार रुपये देण्याचा आदेश आयोगाने मध्य रेल्वेला दिला. रेल्वेने त्रुटीयुक्त सेवा दिल्याने प्रवाशाचे आर्थिक नुकसान झाले आहे, असा ठपकाही आयोगाने निकालपत्रात ठेवला.
याबाबत वडगाव शेरी येथे राहणाऱ्या महिलेने मध्य रेल्वेचे विभागीय व्यवस्थापक आणि मनमाड स्थानक प्रमुखांविरोधात ग्राहक आयोगात तक्रार दाखल केली होती. तक्रारदार मुलासोबत २६ नोव्हेंबर २०१७ रोजी मथुरा ते कर्नाटकातील अलनावर दरम्यान रेल्वेने प्रवास करीत होत्या. या प्रवासासाठी त्यांनी वातानुकूलित कोचमधील दोन बर्थ आरक्षित केले होते. दुसऱ्या दिवशी सकाळी पावणेबाराच्या सुमारास रेल्वे मनमाड स्थानकात आली असता, दोन अनोळखी व्यक्तींनी तक्रारदारांच्या कोचमध्ये प्रवेश केला. त्यापैकी एकाने तक्रारदारांना त्यांचे पैसे आसनाखाली पडल्याची बतावणी केली.
तक्रारदार आसनाखाली पाहात असताना, दुसऱ्या व्यक्तीने त्यांची पर्स पळवली. पर्समधील रोकड, सोन्याचे दागिने, कानातील रिंग, घड्याळ असा एकूण पाच लाख १२ हजार ७०० रुपयांचा मुद्देमाल चोरीला गेल्याने धास्तावलेल्या तक्रारदारांनी मनमाड रेल्वे पोलिसांकडे तक्रार दिली. सुमारे सात महिन्यांनी मनमाड रेल्वे पोलिसांनी या चोरीचा तपास लागत नसल्याने तक्रार बंद करीत असल्याचे सांगितले.
आरक्षित कोचमध्ये त्रयस्थ व्यक्तीने प्रवेश करू नये, याची काळजी घेणे हे रेल्वेचे कर्तव्य असल्याचा दावा करून तक्रारदारांनी मध्य रेल्वेविरोधात थेट ग्राहक आयोगात धाव घेतली. ग्राहक आयोगाने या प्रकरणात मध्य रेल्वेचे विभागीय रेल्वे व्यवस्थापक आणि मनमाड स्थानक प्रमुखांना नोटीस बजावली. मात्र, ते आयोगात हजर न झाल्याने एकतर्फी आदेश काढून आयोगाने निकाल दिला.
