मुंबई: एन्काउंटर स्पेशालिस्ट प्रदीप शर्मा यांच्या निवासस्थानी इन्कम टॅक्स विभागाच्या अधिकाऱ्यांनी छापा टाकला आहे. प्रदीप शर्मा हे मुंबई पोलीस दलातील माजी अधिकारी असून ते एन्काउंटर स्पेशालिस्ट म्हणून ओळखले जातात. मनसुख हिरेन हत्या प्रकरणात आरोपी असलेल्या प्रदीप शर्मा यांना नुकताच सुप्रीम कोर्टाने जामीन मंजूर केला आहे.
माजी पोलीस अधिकारी प्रदीप शर्मा यांच्या निवासस्थानी टाकण्यात आलेला छापा हा एका माजी आमदाराच्या प्रकरणामध्ये असल्याची माहिती मिळत आहे. इन्कम टॅक्स विभागाकडून या प्रकरणी अनेक ठिकाणी छापे टाकले जात आहेत. दुबे नावाच्या एका माजी आमदाराच्या प्रकरणात आयकर विभागाची छापेमारी सुरु असल्याची माहिती समोर येत आहे.
मनसुख हिरेन प्रकरणात प्रदीप शर्मा हे आरोपी असून वर्षभर ते तुरुंगातही होते. त्यांना सुप्रीम कोर्टाने जामीन दिल्यानंतर ते तुरुंगातून बाहेर आले. प्रदीप शर्मा यांचे अंधेरीसह आणखी एका ठिकाणी निवासस्थान असून आयकर अधिकाऱ्यांकडून छापा टाकण्यात आला आहे.
