पुणे : राष्ट्रवादी काँग्रेस पक्ष आणि चिन्ह हे उपमुख्यमंत्री अजित पवार यांना दिल्यानंतर शरद पवार गट चांगलाच आक्रमक झाल्याचं दिसत आहे. निवडणूक आयोगाच्या निर्णयाविरोधात पवार गटाचे कार्यकर्ते वेगवेगळे निदर्शने करत आहेत. अशातच आता पुण्यातील कोथरूड परिसरात राष्ट्रवादी युवक (शरद पवार गट) काँग्रेस गटाकडून शरद पवार यांच्या समर्थनार्थ बॅनरबाजी करण्यात आली आहे. एक सूर्य, एक चंद्र आणि एकच शरदचंद्र असा मजकूर या फ्लेक्सवर पाहायला मिळत आहे. या बॅनरची परिसरात जोरदार चर्चा होत आहे.
काय आहे नेमकं बॅनरवर?
एक सूर्य, एक चंद्र आणि एकच शरदचंद्र असा मजकूर या फ्लेक्सवर पाहायला मिळत आहे. तसेच “फिर हेरा फेरी, हुकूमशाही पद्धतीने पक्ष आणि चिन्ह मिळवलं” असा मजकूर लिहून अजित पवार यांच्यावर जोरदार टीका करण्यात आली आहे. तर दुसऱ्या फ्लेक्सवर “लोकांच्या मनात घर कसे कराल, जोर जबरदस्तीने अन्याय करू शकता, लोकांचे प्रेम मिळू शकत नाही” अशी टीकाही या बॅनरच्या माध्यमातून करण्यात आली आहे.
