Ulhasnagar News : उल्हासनगरमध्ये तरुणावर चाकूने सपासप वार करून प्राणघातक हल्ला केल्याची धक्कादायक घटना उघडकीस आली आहे. मध्यरात्री कॅम्प क्रमांक दोन येथील पवन ज्यूस सेंटरजवळ ही घटना घडली असून अय्याज मोहम्मद खान या तरुणावर हा प्राणघातक हल्ला करण्यात आला आहे.
जखमी तरुणास फसवून मोटार सायकलवर बसवून त्याच्या पाठीत, डोक्यात, मानेवर धारदार शस्त्राने वार करण्यात आले. हल्ला करणारा तरुण हा जखमीचा मित्र असल्याची माहिती मिळत आहे. काही दिवसांपूर्वी या दोघांमध्ये भांडण झाले होते. जुन्या भांडणाचा राग मनात धरून हा हल्ला करण्यात आल्याचे प्राथमिक माहिती समोर आली आहे.
हल्ला करणाऱ्या आरोपीस पोलिसांनी ताब्यात घेतलं आहे. तर जखमी तरुणांची प्रकृती गंभीर असल्याने रात्री उशिरा त्याला मुंबई येथील रुग्णालयात उपचारार्थ हलवण्यात आले आहे. याप्रकरणी उल्हासनगर पोलीस ठाण्यात गुन्हा दाखल करण्यात आला आहे.
