पिंपरी-चिंचवड : पिंपरी-चिंचवड शहरातील सांगवी परिसरात सोनसाखळी हिसकावणाऱ्या इराणी टोळीने उच्छाद मांडला होता. अशात एका सराईत सोनसाखळी चोराला पोलिसांनी अटक केली आहे. मुसा अन्नू सय्यद उर्फ इराणी असे चोरट्याचे नाव आहे. या ईराणी टोळीने सांगवी पोलीस ठाण्याच्या हद्दीत हैदोस घातला होता. मुसा अन्नू सय्यद उर्फ इराणी या आरोपीकडून साठ हजारांचा मुद्देमाल पोलिसांनी जप्त केला आहे.
त्याच्या टोळीतील इतर तीन आरोपींचा शोध सांगवी पोलीस घेत आहेत. मिळालेल्या माहितीनुसार, सांगवी पोलीस ठाण्याच्या हद्दीत पिंपळे गुरव, नवी सांगवी, सांगवी हा भाग उच्चभ्रू परिसरात येतो. रोज मॉर्निंग वॉकसाठी अनेक महिला घराबाहेर पडतात. ही इराणी टोळी त्या महिलांच्या गळ्यातील सोनसाखळी हिसकावून पसार व्हायची. ननुकतीच या टोळीने एकाच दिवशी दोन ठिकाणी सोनसाखळी हिसकावल्याची घटना घडली होती. पोलिसांनी शिताफीने अखेर इराणी टोळीचा म्होरक्या मुसा अन्नू सय्यद उर्फ इराणीला बेड्या ठोकण्यात आल्या आहेत.
पोलिसी खाक्या दाखवल्यावर आरोपीकडून ६० हजारांचा सोन्याचा मुद्देमाल जप्त करण्यात आला. आरोपी इराणीला अहमदनगर तोफखाना पोलिसांनी अटक केली होती. अहमदनगरच्या सब जेलमधून आरोपीला सांगवी पोलिसांनी ताब्यात घेऊन अधिक तपास सुरू केला आहे.
