Pune Accident : पुण्यातील चांदणी चौकात अपघाताची घटना समोर येत आहे. चांदणी चौकात भरधाव येणाऱ्या डंपरने विद्यार्थी वाहतूक करणाऱ्या ऑटो रिक्षाला उडवल्याची घटना घडली आहे. या रिक्षात शाळकरी विद्यार्थी होते, ते सर्व विद्यार्थी एमआयटी ग्रुप स्कूलचे असल्याचं सांगण्यात येत आहे. या अपघातात रिक्षातील पाच विद्यार्थी जखमी झाले असल्याची प्राथमिक माहिती आहे.
मिळालेल्या अधिक माहितीनुसार, शाळा सुटल्यानंतर ही रिक्षा विद्यार्थ्यांना घेऊन मुंबई-बेंगळुरू महामार्गावरून जात होती. महामार्गावरील भुयारी मार्गात रिक्षा आणि डंपरची जोरदार धडक झाली. दरम्यान, रिक्षा चालकाचे नियंत्रण सुटल्याने हा अपघात घडला आहे.
पोलिसांनी घटनास्थळी धाव घेत विद्यार्थ्यांना रुग्णालयात दाखल केलं आहे. जखमी झालेल्या पाच विद्यार्थ्यांपैकी तीन विद्यार्थ्यांना एशियन हॉस्पिटलमध्ये, तर एका विद्यार्थ्याला दुसऱ्या खासगी हॉस्पिटलमध्ये दाखल करण्यात आल्याची माहिती पोलिसांनी दिली.
