राजेंद्रकुमार शेळके
पुणे : राष्ट्रवादी काँग्रेसचे राष्ट्रीय अध्यक्ष शरद पवार यांच्या वाढदिवसाचे औचित्य साधून येथील महामाता रमामाई भीमराव आंबेडकर राष्ट्रीय स्मारक समितीच्या वतीने पुणे स्टेशन परिसरातील निराधार व गरीब लोकांना ब्लॅंकेट वाटप करण्यात आले.
संस्थेचे मुख्य समन्वयक विठ्ठल गायकवाड, साखळी तालीम राष्ट्रीय मारुती मंदिराचे अध्यक्ष रवींद्र माळवदकर त्याचप्रमाणे राष्ट्रवादी काँग्रेस युवती विभागाच्या नेत्या शिवानी रवींद्र माळवदकर यांच्या प्रयत्नातून निराधार, गरीबांना थंडीमध्ये मायेची ऊब मिळावी म्हणून ब्लॅंकेटचे वाटप करण्यात आले.
महाराष्ट्राचा लोकनेता म्हणून ज्यांची ख्याती आहे, त्या साहेबांचा आदर्श डोळ्यांसमोर ठेऊन समाजातील प्रत्येक घटकाने सामाजिक बांधिलकी जोपासावी, अशी भावना या वेळी व्यक्त करण्यात आली. याप्रसंगी राष्ट्रवादी काँग्रेसचे नेते भाई कात्रे, शिवराज माळवदकर व कार्यकर्ते मोठ्या संख्येने उपस्थित होते.
