सिंधुदुर्ग : देवगडमधील समुद्र किनाऱ्यावर मोठी दुर्घटना घडली आहे. येथे पर्यटनासाठी आलेले पाच पर्यटक बुडाले आहेत. यामधील चौघांचे मृतदेह मिळाले असून एक जण बेपत्ता आहे. मिळालेल्या माहितीनुसार, हे सर्व पर्यटक पुणे येथील खासगी सैनिक अकॅडमीचे विद्यार्थी आहेत. मृत्यू झालेल्यामध्ये चार मुलींचा समावेश आहे, तर एक मुलगा बेपत्ता आहे.
शनिवारी दुपारी तीन ते चार वाजण्याच्या सुमारास ही घटना घडली. पिंपरी चिंचवड येथील एका सैनिक अकॅडमीची 35 जणांची सहल देवगडमध्ये आली होती. हे पाच जण समुद्रात आंघोळीसाठी उतरले होते. त्यावेळी पाचही जण बुडाले. सर्व मृतदेह ग्रामीण रुग्णालयात हलविण्यात आले. मृतांमध्ये प्रेरणा डोंगरे, अंकिता गालटे, अनिशा पडवळ, पायल बनसोडे यांचा समावेश आहे. तर राम डिचोलकर बेपत्ता आहे.
सिंधुदूर्ग जिल्ह्यातील देवगड समुद्र किनारी पर्यटनासाठी पिंपरी चिंचवड येथील एका खासगी सैनिक अकॅडमीची ३५ जणांची सहल आली होती. समुद्र किनाऱ्यावर पोहचल्या नंतर आघोळ करण्याचा मोह काही पर्यटकांना आवरला नाही. त्यानंतर यामधील काही जण समुद्रात आंघोळीसाठी गेले. यातील पाच जण समुद्रातील पाण्याचा अंदाज न आल्याने बुडाले. यामध्ये चार मुली आणि एक मुलगा होता. चौघांचे मृतदेह मिळाले असून एक जण अजूनही बेपत्ता आहे. या घटनेची माहिती मिळताच पोलीस निरीक्षक निळकंठ बगळे यांच्यासह पोलीस सहकारी , तहसीलदार रमेश पवार नगराध्यक्ष साक्षी प्रभू घटना स्थळी दाखल झाले.
