पुणे : पुणे-मुंबई महामार्गावर भाजप नेते नितेश राणे यांच्या कारचा उर्से टोल नाक्यावर रविवारी (ता.५) संध्याकाळी साडेपाच वाजण्याच्या सुमारास अपघात झाला आहे. या मोटारीत नितेश राणे त्यांची पत्नी, मुले आणि नातेवाईक असल्याची माहिती समोर येत आहे.
मिळालेल्या माहितीनुसार, नितेश राणे हे कुटुंबासह मुंबईकडून पुण्याच्या दिशेने चालले होते. त्यांची गाडी सायंकाळी साडेपाच वाजण्याच्या सुमारास उर्से टोल नाका येथे आली. टोलनाक्यावर टोल भरण्यासाठी रांगेत उभी असताना, तेव्हा अचानक पाठीमागून आलेल्या भरधाव वेगाने ट्रकने राणे कुटुंबीयांच्या मोटारीला धडक दिली. सुदैवाने या अपघातात कोणीही जखमी झाले नाही.
दरम्यान, या घटनेची माहिती मिळताच पिंपरी-चिंचवड शहर पोलिसांच्या शिरगाव पोलिसांनी ट्रक चालकाला ताब्यात घेतले आहे. तरी, पुढील तपास शिरगाव पोलीस करीत आहेत.
