लोणी काळभोर, ता.२३ : बुलेट व यामाहा गाडीची चोरी करून त्याच्या विक्रीसाठी आलेल्या दोन अट्टल वाहनचोरांना अटक केली. ही कारवाई दरोडा व वाहनचोरी विरोधी पथक २ च्या पोलिसांनी नायगाव फाटा (ता. हवेली) येथील अल्फा पेट्रोल पंपाजवळ केली.
नाना उर्फ मल्हारी बाबुराव पोळे (वय-२७ रा. आष्टा ता. लोहारा जि.धाराशिव) व कार्तिक प्रकाश भुजबळ (वय-२६ रा. लोणी काळभोर, पुणे) अशी अटक करण्यात आलेल्या आरोपींची नावे आहेत. त्यांच्याकडून ७० हजार रुपये किंमतीचा मुद्देमाल जप्त केला.
पोलिसांनी दिलेल्या माहितीनुसार, दरोडा व वाहनचोरी विरोधी पथक २ मधील पोलीस अधिकारी व कर्मचारी हडपसर व लोणी काळभोर पोलीस ठाण्याच्या हद्दीत गस्त घालत होते. गस्त घालत असताना पोलीस अंमलदार शिवाजी जाधव व उदय काळभोर यांना दोन दुचाकी चोरटे चोरीच्या गाड्या विकण्यासाठी नायगाव फाटा येथील अल्फा पेट्रोल पंपाजवळ येणार आहेत, अशी माहिती पोलिसांना एका खबऱ्यामार्फत मिळाली होती. मिळालेल्या माहितीच्या अनुषंगाने, पोलिसांनी सदर ठिकाणी सापळा रचून दोन्ही चोरट्यांना मोठ्या शिताफीने ताब्यात घेतले.
दरम्यान, पोलिसांनी आरोपी नाना उर्फ मल्हारी पोळे व कार्तिक भुजबळ यांना ताब्यात घेऊन अधिक चौकशी केली असता, आरोपींनी लोणी काळभोर पोलीस ठाण्याच्या हद्दीतून दुचाकी चोरी केल्याची पोलिसांना कबुली दिली. त्यांच्याकडून ७० हजार रुपये किंमतीचा मुद्देमाल जप्त केला आहे.
ही कारवाई दरोडा व वाहनचोरी विरोधी पथक २ चे वरिष्ठ पोलीस निरीक्षक नंदकुमार गायकवाड यांच्या मार्गदर्शनाखाली पोलीस अंमलदार उदय काळभोर, राजेश अभंगे, सुदेश सपकाळ, शिवाजी जाधव व अमोल सरतापे यांच्या पथकाने केली.
