जीवन सोनावणे
भोर, (पुणे) : तालुक्याच्या वेळवंड खोऱ्यातील पसुरे येथे बुधवारी (दि.६) रात्री बिबट्या आढळला. पसुरेतील स्थानिक रहिवाशी रतन शिळीमकर हे कामानिमित्त बाहेरून घरी परतत असताना पसुरे येथील वरपेवाडी रस्त्यावर त्यांना बिबट्या आढळून आला असता त्यांनी आपल्या गाडीतून बिबट्याचा व्हिडिओ चित्रित केला.
शिळीमकर यांनी याबाबतची माहिती पसुरेचे विद्यमान सरपंच पंकज धुमाळ यांना कळविली. सरपंच धुमाळ यांनी तात्काळ वनविभागाचे वनपरिक्षेत्र अधिकारी एस. राऊत, वनपाल एस. आर. खट्टे, वनरक्षक के. पी. देठे यांच्याशी संपर्क साधून ही माहिती त्यांना कळवली.
दरम्यान, वनविभागाच्या वतीने तेथील स्थानिकांना व आजूबाजूच्या परिसरातील नागरिकांना सतर्कतेचा व सावधगिरी बाळगण्याचा इशारा दिला असून, बिबट्याविषयी जनजागृती करण्याचे आवाहन केले आहे.
