पुणे : पती आणि सासरच्या मंडळींच्या सततच्या टोमण्यांमुळे हृदयात ब्लॉकेज झाल्याची तक्रार एका विवाहित महिलेने सहकारनगर पोलीस ठाण्यात केली आहे. या प्रकरणी धनकवडी येथील पतीसह सहा जणांविरुद्ध गुन्हा दाखल करण्यात आला आहे. हा सगळा प्रकार जुलै २०२१ ते मार्च २०२३ या दरम्यान घडला आहे.
प्रतीक चोथे, दिलीप चोथे, अंजली क्षीरसागर, वैशाली शिंदे, विद्या भगत, रुपाली तोडमल अशी गुन्हा दाखल करण्यात आलेल्यांची नावे आहेत.
पोलिसांनी दिलेल्या माहितीनुसार, महिलेचे २०२१ मध्ये धनकवडी इथल्या प्रतीक यांच्याशी लग्न झाले आहे. मात्र काही महिन्यांमध्ये पती आणि सासरची मंडळी आपल्याला वारंवार मानसिक त्रास देत असल्याचे या महिलेने तक्रारीत म्हटले आहे. दोन वर्षांपासून आपला सतत मानसिक छळ होत आहे. या त्रासामुळेच आपल्या हृदयात ब्लॉकेज आढळले आहे, अशी तक्रार या महिलेने दिली आहे.
या प्रकरणी सहकारनगर पोलिसांनी सहा जणांविरुद्ध गुन्हा दाखल केला आहे. पुढील तपास पोलीस करीत आहेत.
