पुणे : व्यसन करणार नाही आणि करू देणारीही नाही, अशी शपथ पुण्यातील एक लाख विद्यार्थ्यानी घेतली. या शपथेची नोंद ‘लंडन बुक ऑफ वर्ल्ड रेकॉर्ड’ व ‘एशिया बुक ऑफ रेकॉर्ड’मध्ये करण्यात आली आहे.
आर्ट ऑफ लिव्हिंग फाऊंडेशनसह शहरातील शैक्षणिक संस्थांतर्फे झालेल्या ‘एज्युयूथ मीट’ या कार्यक्रमाचे नुकतेच आयोजन करण्यात आले होते. यावेळी विद्यार्थ्यांनी शपथ घेतली आहे.
यावेळी अध्यात्मिक गुरू श्री श्री रवीशंकर, खासदार विनय सहस्त्रबुद्धे, नॅकच्या कार्यकारी समितीचे अध्यक्ष डॉ. भूषण पटवर्धन, राजेश पांडे, माजी कुलगुरू डॉ. नितीन करमळकर, आर्ट ऑफ लिव्हिंगचे राजेश शास्तारे, एज्युयूथ मीटचे प्रमुख हिमांशू नगरकर, शेखर मुंदडा आदी मान्यवर उपस्थित होते.
यावेळी बोलताना श्री श्री रविशंकर म्हणाले कि, विद्यार्थ्यांमधील प्रतिभा जागृत करण्यासाठी नवीन शैक्षणिक धोरण उपयोगी ठरेल. प्रत्येक विद्यापीठ आणि शैक्षणिक संस्था आनंदाचे, नवनिर्मितीचे कॅम्पस झाले पाहिजे. नवीन शैक्षिणक धोरण हे क्रांतिकारक पाऊल आहे. तरुणाईच भारताला नशामुक्त करू शकते. त्यासाठी तरुणांनी नवीन उत्साह सोबत घेऊन चालायचे आहे.
प्रत्येक गोष्टीतील आव्हानांचा सामना करतो तो युवा असतो. मानसिक स्वास्थ्यासाठी ध्यान आणि योग करा, जीवन गमावून आत्महत्या करू नका, असेही त्यांनी यावेळी विद्यार्थ्यांना सांगितले.
