पुणे : सिंहगडावर दुचाकीवरुन फिरायला गेलेल्या तरुण-तरुणीने परतत असताना गुगल मॅपवरुन रस्ता शोधत जाताना ट्रकने धडक दिल्यामुळे एका संगणक अभियंता युवतीचा जागेवरच मृत्यू झाल्याची घटना घडली आहे.
रिदा इम्तियाज मुकादम (वय २३, रा. खराडी) असे मृत युवतीचे नाव आहे. तर दुचाकीस्वार नटराज अनिलकुमार (वय ३०, रा. वानवडी) हा जखमी झाला आहे. हा अपघात मुंबई-बंगळुरू बाह्यवळण मार्ग परिसरात झाला. याबाबत भारती विद्यापीठ पोलिस ठाण्यात गुन्हा दाखल केला असून अपघातानंतर ट्रकचालक पसार झाला आहे.
पोलिसांनी दिलेल्या माहितीनुसार, रिदा आणि नटराज खराडी भागातील एका माहिती-तंत्रज्ञान कंपनीत संगणक अभियंता आहेत. ते दोघे सिंहगडावर फिरण्यासाठी गेले होते. त्यांना वानवडीला जायचे असल्याने ते गुगल मॅपवर रस्ता शोधत असताना मुंबई-बंगळुरू बाह्यवळण मार्गावर आले.
दुचाकी चालवत असलेल्या नटराज आणि रिदा बाह्यवळणावरुन नवीन कात्रज बोगद्याकडे गेले. नंतर आपला रस्ता चुकल्याचे नटराजच्या लक्षात आले. गुगल मॅपने चुकीचा मार्ग दाखवल्याने ते महामार्गावर आले. नवीन कात्रज बोगद्याजवळून वळण घेत असताना भरधाव वेगात आलेल्या ट्रकची धडक दुचाकीला बसली. यामध्ये रिदाच्या डोक्याला गंभीर दुखापत झाल्याने तिचा जागीच मृत्यू झाला.
दरम्यान, अपघातानंतर ट्रक चालक न थांबता निघून गेला. याबाबत नटारज याने भारती विद्यापीठ पोलीस ठाण्यात फिर्य़ाद दिली आहे. पोलिसांनी अज्ञात ट्रक चालकावर गुन्हा दाखल केला असून पोलीस ट्रक चालकाचा शोध घेत आहेत. पुढील तपास पोलीस उपनिरीक्षक अतुल थोरात करत आहेत.
