पुणे : सिंहगड पोलिस ठाण्याच्या मागील बाजूस हाकेच्या अंतरावर मंगळवारी (ता. २४) भरदिवसा गोळीबार झाल्याची घटना घडली. या गोळीबारात एकजण जखमी झाला आहे.
रमेश राठोड (रा. वारजे, पुणे) असे जखमी झालेल्या व्यक्तीचे नाव आहे. याप्रकरणी संतोष पवार (रा. बावधन, पुणे) यांना पोलिसांनी ताब्यात घेतले आहे.
मिळालेल्या माहिती नुसार संतोष पवार, देवा राठोड व रमेश राठोड यांच्यासह अन्य काहीजण सिंहगड रस्ता परिसरातील सनसिटी भागातील योगीराज ऑटो सेंटरमध्ये चर्चा करीत होते.
यातील देवा राठोड यांनी त्यांच्या समाजाच्या व्हॉट्सॲप ग्रूपवर संतोष पवार यांच्याबद्दल काहीतरी लिहिले होते. यावरून संतोष पवार व देवा राठोड यांच्यात बाचाबाची झाली.
या भांडणात रमेश राठोड हे मध्ये पडल्याने संतोष पवार यांनी कमरेला असणारी पिस्तूल काढून रमेश राठोड यांच्या दिशेने गोळीबार केला. यात रमेश राठोड यांच्या पायाला गोळी लागल्याने ते जखमी झाले. गोळीबारात जखमी झाल्यानंतर रमेश राठोड यांना रुग्णालयात दाखल करण्यात आले आहे.
या घटनेची माहिती मिळताच सिंहगड रस्ता विभागाचे सहाय्यक आयुक्त राजेंद्र गलांडे, सिंहगड रोड पोलिस ठाण्याचे वरिष्ठ पोलिस निरीक्षक शैलेश संख्ये, पोलिस निरीक्षक (गुन्हे) जयंत राजुरकर आणि इतर अधिकारी व कर्मचार्‍यांची घटनास्थळी धाव घेतली.
पोलिसांनी गोळीबार करणार्‍या संतोष पवारला ताब्यात असून या घटनेचा पुढील तपास पोलीस करीत आहेत.
