रांजणगाव: रांजणगाव औद्योगिक परिसरात पार्किंग केलेल्या ट्रक व इतर वाहनांचे डिझेल चोरणाऱ्या टोळीतील दोघा जणांना रांजणगाव एमआयडीसी पोलीसांनी पकडले असून त्यांच्याकडून डिझेल चोरीचे सहा गुन्हे उघड झाले आहेत. त्यांच्याकडून एकूण ९५ हजाराचा मुद्देमाल पोलिसांनी जप्त केला असून, त्यांचे आणखी तीन साथीदार असल्याची माहिती रांजणगाव पोलीस स्टेशनचे पोलीस निरीक्षक महादेव वाघमोडे यांनी दिली आहे.
याबाबत रांजणगाव पोलीस स्टेशन येथे सागर अरुन टेमगिरे (रा. पारोडी, ता. शिरुर, जि. पुणे), विकास अनिल मलगुंडे (रा. ढोसांगवी, ता. शिरुर, जि. पुणे), संदिप शामराव राऊत, बापुराव जनाभाऊ कावळे साहिल सुनील गावडे या पाच फिर्यादींच्या वाहनातील डिझेल चोरीची फिर्याद दिली होती.
रोहन अनिल अभंग (वय 27 वर्षे), निखिल पांडुरंग रोकडे (वय 21 वर्षे, दोन्ही रा. संगमनेर, जि. अहिल्यानगर) यांना अटक केली असून, साथीदार वैभव बाबासाहेब सुरवडे (रा. जामखेड, जि.अहिल्यानगर), समाधान देवीदास राठोड (रा.कोपरगाव, जि. अहिल्यानगर), सचिन देवीदास दाणे (रा. येवला, जि. नाशिक)या आरोपींनी हा गुन्हा केल्याचे मान्य केले आहे.
याबाबत रांजणगाव पोलिसांनी दिलेली माहिती पुढील प्रमाणे, रांजणगाव औद्योगिक वसाहतीमध्ये मोठ्या प्रमाणात जड वाहनांची आवक जावक असते.
कंपनीचा माल घेऊन आलेले ट्रक औद्योगिक वसाहतीतील पार्किंग मध्ये लावले असताना रात्रीच्या वेळेस चालक झोपी गेले असताना या वाहनांमधील डिझेल चोरीच्या तक्रारी आल्या होत्या. याबाबत रांजणगाव पोलीस स्टेशनचे स्थानिक तपास पथकास या प्रकरणाचा तपास करण्याचे आदेश दिले होते.
तपास पथकाने तांत्रिक विश्लेषणाच्या आधारे व गोपनीय माहितीवरून रांजणगाव पोलीस स्टेशनचे सहाय्यक फौजदार दत्तात्रय शिंदे, पोलीस कॉन्स्टेबल उमेश कुतवळ, योगेश गुंड, प्रवीण पिठले, संतोष औटी, यांनी रोहन अभंग व प्रविण रोकडे यांना अटक केली असून, त्यांनी रांजणगाव पोलीस स्टेशन हद्दीतील ५ गून्हे, शिरूर पोलिस स्टेशन हद्दीत १ गुन्हा असे सहा गुन्हे केल्याची कबुली दिली आहे. हे गुन्हे त्यांनी त्यांचे आणखी तीन साथीदारांच्या मदतीने केल्याचे सांगीतले आहे. अटक आरोपींकडून आठशे लिटर डिझेल, किंमत ७५ हजार, बॅटरी किंमत २० हजार असा एकूण ९५ हजाराचा ऐवज जप्त केला आहे.
ही कार्यवाही पुणे ग्रामीण पोलीस अधीक्षक पंकज देशमुख, पुणे विभाग अप्पर पोलीस अधीक्षक रमेश चोपडे, शिरूर उपविभागीय पोलीस अधिकारी प्रशांत ढोले यांच्या मार्गदर्शनाखाली पोलीस निरीक्षक महादेव वाघमोडे, सहाय्यक फौजदार दत्तात्रय शिंदे, पोलीस कॉन्स्टेबल उमेश कुतवळ, पोलीस कॉन्स्टेबल योगेश गुंड, पोलीस कॉन्स्टेबल प्रवीण पिठले, पोलीस हवालदार संतोष औटी, पोलीस हवालदार विलास आंबेकर, या पथकाने केली आहे, पुढील तपास रांजणगाव पोलीस स्टेशनचे सहाय्यक फौजदार गुलाब येळे करीत आहे.
