पुणे : पत्नी व तिच्या माहेरकडील मंडळींच्या त्रासाला कंटाळून पतीने आत्महत्या केल्याची धक्कादायक घटना मुंढवा परिसरात रविवारी (ता.४) घडली आहे. याप्रकरणी पत्नीसह चौघांवर मुंढवा पोलीस ठाण्यात गुन्हा दाखल करण्यात आला आहे. सौरभ झा (वय-३१) असे आत्महत्या केलेल्या पतीचे नाव आहे.
याप्रकरणी सौरभ यांची आई श्यामल किशोर झा (वय-५९, रा. लोहगाव, पुणे) यांनी मुंढवा पोलीस ठाण्यात तक्रार दिली. त्यानुसार पत्नी, मेव्हणा, मेहुण्याची पत्नी आणि सासरे (सर्व रा. बिहार) यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सौरभ झा यांना बेंगलोर येथे फ्लॅट घेण्यासाठी पत्नी आणि तिच्या कुटुंबीयांनी शिवीगाळ करत मारहाण केली होती. त्यामुळे सौरभचे मानसिक संतुलन बिघडले होते. त्यानंतर सौरभ याने पत्नी आणि तिच्या कुटुंबाकडून होणाऱ्या त्रासाला वैतागून ४ डिसेंबर रोजी आत्महत्या केली.
दरम्यान, याप्रकरणी पोलिसांनी अकस्मात मृत्यू नोंद केली होती. मात्र फिर्यादी यांच्या तक्रारीनंतर पोलिसांनी चार जणांवर आयपीसी ३०६, ३४ नुसार गुन्हा दाखल केला आहे.
