पुणे : पुण्यामध्ये गुन्हेगारीच्या घटनांमध्ये वाढ झालेली दिसून येत आहे. अशातच आता पुन्हा एकदा पुण्यातून एक धक्कादायक घटना समोर येत आहे. मार्केट यार्ड भागात एका बँकेतील सुरक्षारक्षकाला चाकूच्या धाक दाखवून लुटण्याचा प्रयत्न करण्यात आला आहे. याप्रकरणी अल्पवयीनाविरुद्ध मार्केट यार्ड पोलिसांनी गुन्हा दाखल केला.
विजय महादेव गायकवाड (वय ५५, रा. शिवदर्शन) यांनी मार्केट यार्ड पोलीस ठाण्यात फिर्याद दिली आहे. गायकवाड यांनी दिलेल्या फिर्यादीनुसार, एका अल्पवयीनाविरुद्ध गु्न्हा दाखल करण्यात आला आहे.
पोलिसांनी दिलेल्या माहितीनुसार, गायकवाड मार्केट यार्डातील दी कराड अर्बन बँकेत सुरक्षारक्षक म्हणून कार्यरत आहेत. गुरुवारी मध्यरात्री बँकेच्या आवारामध्ये अल्पवयीन शिरला. त्याने गायकवाड यांना चाकूचा धाक दाखविला. पैसे न दिल्यास जिवे मारण्याची धमकी त्याने गायकवाड यांना दिली. सुरक्षारक्षकाने प्रतिकार केल्यानंतर अल्पवयीन पसार झाला. याप्रकरणी पोलीस उपनिरीक्षक प्रकाश जगताप पुढील तपास करत आहेत.
