हैदराबाद : ज्या चित्रपटाची प्रेक्षक आवर्जून वाट बघत होते तो अल्लू अर्जुन आणि रश्मिका मंदाना स्टारर ‘पुष्पा 2: द रुल’ आज जगभरात प्रदर्शित होणार आहे. पण, त्यापूर्वीच चित्रपटाला गालबोट लागल्याचे समोर आले आहे. 4 डिसेंबर रोजी हैदराबादच्या संध्या थिएटरमध्ये या चित्रपटाच्या प्रीमियर शोचं आयोजन करण्यात आलं होतं. या प्रीमियर शोसाठी अल्लू अर्जुन उपस्थित राहणार असल्याची बातमी वाऱ्यासारखी पसरली आणि आपल्या लाडक्या पुष्पाला पाहण्यासाठी चाहत्यांची मोठी गर्दी जमली. तिथे प्रचंड धक्काबुक्कीसह चेंगराचेंगरी झाली. गर्दी नियंत्रित करण्यासाठी पोलिसांना लाठीचार्ज करावा लागला. या दुर्घटनेत एका महिलेचा दुर्दैवी मृत्यू झाल्याची माहिती मिळत आहे. दरम्यान, या दुर्घटनेचे अंगावर काटा आणणारे फोटो आणि व्हिडीओ सोशल मीडियावर व्हायरल होत आहेत.
अल्लू अर्जुनचा बहुप्रतीक्षित पुष्पा 2 हा चित्रपट आज जगभरातील थिएटर्समध्ये रिलीज करण्यात आला आहे. पण, रिलीजच्या एक दिवस अगोदर हैदराबादच्या प्रीमियर शोमध्ये घडलेल्या दुर्घटनेमुळे रिलीजचा आनंदावर काहीसं विरझण पडलं आहे. या दुर्घटनेत 39 वर्षीय महिलेचा मृत्यू झाल्याची माहिती समोर आली आहे. तसेच, एका मुलाची प्रकृती गंभीर आहे. मीडिया रिपोर्ट्सनुसार, ज्या मुलाची प्रकृती गंभीर आहे, तो मृत महिलेचा लहान मुलगा असल्याची माहिती मिळत आहे.
मीडिया रिपोर्ट्सनुसार, दिलसुखनगर राहणारी रेवती पुष्पा 2 चा प्रीमियर शो पाहण्यासाठी पोहोचली होती, त्यावेळी झालेल्या चेंगराचेंगरीत तिचा मृत्यू झाला. मृत महिला पती भास्कर आणि दोन मुलांसह चित्रपटाच्या प्रीमियरला गेली होती. रात्री 10.30 च्या सुमारास गोंधळ उडाला, जेव्हा स्क्रिनिंगला उपस्थित असलेला चित्रपट अभिनेता अल्लू अर्जुनची एक झलक पाहण्यासाठी चाहत्यांची गर्दी जमली होती. त्यावेळी तिथे प्रचंड चेंगराचेंगरी झाली. त्यामध्ये या महिलेचा मृत्यू झाला आहे.
मदतीला लोक धावले, पण..
व्हायरल झालेल्या व्हिडीओमध्ये पोलीस आणि आसपासचे लोक पीडितेच्या मदतीसाठी धावताना दिसत आहेत. रेवतीला रुग्णालयात नेण्यापूर्वी तिला सीपीआर देण्याचा प्रयत्नही करण्यात आला होता. मात्र, तिचा जागीच मृत्यू झाला होता. दरम्यान, मिळालेल्या माहितीनुसार, मुलाची प्रकृती चिंताजनक आहे.
अल्लू अर्जुनला पाहण्यासाठी चाहत्यांची स्पर्धा..
इंडिया टुडेच्या रिपोर्ट्सनुसार, जेव्हा अल्लू अर्जुनच्या येण्याची माहिती मिळाली, त्यावेळी जमलेली गर्दी अनियंत्रित झाली. अल्लू अर्जुनची एक झलक पाहण्यासाठी, त्याच्या जवळ जाण्यासाठी लोकांनी हाणामारीही सुरू केली. त्यावेळी पोलिसांना नाईलाजास्तव लाठीचार्ज करावा लागला. काही वेळातच पोलीस आणि सुरक्षा रक्षकांच्या गराड्यात अल्लू अर्जुन तिथून निघून गेला.
‘पुष्पा’चा सिक्वेल..
सुकुमार यांनी चित्रपटाचे दिग्दर्शन केलं असून 2021 मध्ये रिलीज झालेल्या ‘पुष्पा: द राइज’चा ‘पुष्पा 2: द रुल’ सिक्वेल आहे. हा चित्रपट 10 हजार स्क्रीन्सवर रिलीज झाला आहे. पोस्ट-प्रॉडक्शन विलंबामुळे 3D आवृत्तीचं प्रकाशन शेवटच्या क्षणी रद्द करण्यात आलं. यात अल्लू अर्जुनसह रश्मिका मंदाना, फहद फासिलसह अनेक स्टार्स आहेत.
