मनमाड (नाशिक) : नाशिकच्या येवला शहरातील नगर- मनमाड मार्गावर असलेल्या एका पैठणीच्या दुकानातून काल रात्रीच्या सुमारास मोठी चोरी झाली आहे. या दुकानातून सुमारे दीड कोटी रुपयांच्या पैठणींची चोरटयांकडून चोरी करण्यात आली आहे. या प्रकरणी पोलिसात नोंद करण्यात आली आहे.
या बाबत अधिक माहिती अशी की, नाशिक जिल्ह्यातील येवला शहरातील नगर- मनमाड मार्गावर असलेल्या लक्कडकोट पैठणी दुकानात ही चोरी झाली असल्याची माहिती मिळत आहे. रात्रीच्या सुमारास अज्ञात चोरट्यांनी शोरुमच्या दुकानाची खिडकी तोडत आत प्रवेश केला. यानंतर दुकानातील महागड्या पैठण्या चोरुन नेल्या आहेत. सदर घटना सकाळी दुकानचे मालक सुनिल लक्कडकोट यांच्या लक्षात येताच त्यांनी याबाबत पोलिसांना फोन करुन माहिती दिली.
चोरट्यांनी महागड्या पैठणी साड्या बरोबरच शोरूममध्ये लावण्यात आलेल्या सीसीटीव्ही कॅमेराचा डीसीआर सुद्धा लंपास नेला आहे. यामुळे पोलिसांपुढे तपासाचे मोठे आव्हान उभे आहे. दरम्यान पोलिसांनी डॉग स्कॉड घटनास्थळी आणत चोरट्यांचा माग घेण्याचा प्रयत्न करण्यात आला. पोलिसांनी याप्रकरणी अधिक तपास सुरु केला आहे. या घटनेने परिसरात मोठी खळबळ उडाली असल्याचे बघायला मिळाले.
