पुणे : खेड तालुक्यातील एका गावात मित्राचा खून करून पसार झालेल्या संशयित आरोपीला पोलिसांनी गुरुवारी (दि. १४) ससून रुग्णालयाच्या परिसरातून अटक केली. तपासासाठी त्याला खेड पोलिसांच्या ताब्यात देण्यात आले आहे. सलमान अबुलगनी शेख (वय २३, रा. वडगाव शिंदे रस्ता, आळंदी, मूळ रा. अलिपूर बाजार, उत्तर प्रदेश) हे आरोपीचे नाव आहे.
खेड तालुक्यातील खरपुडी फाटा परिसरात शेख याने मित्र शरद गायकवाड याचा ३ नोव्हेंबर २०२४ ला चाकूने भोसकून खून केला. या प्रकारानंतर तो पसार झाला होता. बंडगार्डन पोलिसांचे पथक गुरुवारी ससून रुग्णालय परिसरात गस्त घालत असताना त्यांनी शेख याच्या संशयास्पद हालचाली टिपल्या. त्यामुळे त्याला ताब्यात घेऊन पोलिसांनी त्याची चौकशी केली. त्यामध्ये त्याने खून केल्याची कबुली दिली. त्याला पुढील तपासासाठी खेड पोलिसांकडे सुपूर्द करण्यात आले आहे.
