लातूर : लातूरमधून भीषण अपघाताची बातमी समोर आली आहे. उदगीर तालुक्यातील एकुरकाजवळ कारचा भीषण अपघात झाला आहे. या अपघातात 4 महिलांचा जागीच मृत्यू झाला आहे. तर तीन जण जखमी झाले आहे. जखमींना तात्काळ शासकीय रुग्णालयात उपचारासाठी दाखल करण्यात आलं आहे.
याबाबत अधिक माहिती अशी की, उदगीर तालुक्यातील एकुरकाजवळ आज गुरुवारी दुपारी 2 वाजेच्या सुमारास ही घटना घडली आहे. मारुती स्विफ्ट डिझायर कारने या महिला उदगीरहून एकुरगाकडे जात होत्या. एकुरगा गावाजवळ पोहोचले असताना ही चार भरधाव आयशर टेम्पोला धडकली. हा अपघात इतका भीषण होता की, यामध्ये कारचा अक्षरशः चुराडा झाला आहे. या अपघातात चार महिला जागीच ठार झाल्या आहेत.
या अपघातात मंगलबाई गोविंद जाधव (वय ५५ वर्ष, रा. एकुरका) प्रतिभा संजय भंडे (वय ३०, रा. दावणगावं), प्रणिता पांडुरंग बिरादार (वय २५, रा. होणाळी) अन्यना रणजित भंडे (वय १४ वर्ष, रा. दावणगावं) यांचा अपघातात जागीच मृत्यू झाला आहे. अन्य तिघा जखमींवर उपचार सुरू आहेत. सर्व मृतदेह शवविच्छेदन करण्यासाठी उदगीर सामान्य रुग्णालयात दाखल करण्यात आले आहे. एकाच वेळी चार महिलांचा मृत्यू झाल्यामुळे गावावर शोककळा पसरली असून हळहळ व्यक्त केली जात आहे. या प्रकरणाची पोलिसांनी नोंद केली असून अधिक तपास करत आहे.
