मुंबई : ऐन दिवाळीच्या दिवशी मुंबईत आगाची घटना घडल्याचे समोर आले आहे. अंधेरीतील पूर्व एमआयडीसी परिसरातील भंगारवाडीमध्ये आगीची घटना घडली आहे. पाच ते सहा दुकानांना आग लागली आहे. घटनास्थळी सिलेंडर स्फोट झाल्याचीही माहिती आहे. या आगीत अद्याप कोणताही जीवितहानी झाल्याचे वृत्त नाही. मात्र, आगीत काही कामगार अडकल्याची भीती वर्तवली जात आहे. घटनेची माहिती मिळताच घटनास्थळी अग्निशमन दलाच्या गाड्या दाखल झाल्या असून आग विझवण्याचं काम युद्धपातळीवर असून या आगीत ८ ते १० सिलेंडर स्फोट झाल्याची माहिती आहे.
मिळालेल्या माहितीनुसार, अंधेरी एमआयडीसी परिसरातील भंगारवाडी इथं ही घटना घडली असल्याची माहिती मिळत आहे. सिलेंडरचा स्फोट होऊन आग लागल्याची घटना घडली आहे. या आगीमध्ये लागोपाठ आठ ते दहा सिलेंडरचा स्फोट झाल्याची माहिती समोर आली आहे. सिलेंडर स्फोटामुळे परिसर हादरून गेला आहे. लाकडाची वखार असल्यामुळे आगीने काही क्षणात रौद्ररुपधारण केलं. यामध्ये संपूर्ण लाकडाची वखार जळून खाक झाली असून, परिसरात भीतीचे वातावरण निर्माण झाले आहे. आगीची माहिती मिळताच अग्निशमन दलाचे जवान घटनास्थळी दाखल झाले आहे. ८ ते १० गाड्या घटनास्थळी दाखल आहे. आग आटोक्यात आणण्यासाठी शर्थीचे प्रयत्न सुरू आहे.
