पुणे : पुण्यामध्ये आर्थिक व्यवस्थेला दिशा देणारे संशोधन केंद्र उभारण्यात येणार आहे. तसेच नवीन शैक्षणिक धोरणात व्यवसायाभिमूख, कौशल्य विकास, गरजेप्रमाणे देण्यात येणाऱ्या शिक्षणाचा समावेश करण्यात आला आहे. यासोबतच संस्कृती, तत्वज्ञान आणि विज्ञानाला स्थान देण्यात आले. तसेच यापुढे विद्यार्थ्यांच्या कौशल्य विकसित करणारे शिक्षण देणाऱ्या शिक्षण संस्थांना परवानगी देणार आहे, अशी माहिती पालकमंत्री आणि राज्याचे उच्च व तंत्रशिक्षण मंत्री चंद्रकांत पाटील यांनी दिली.
मराठा चेंबर ऑफ कॉमर्स इंडस्ट्रीज अँड ॲग्रीकल्चरच्या सभागृहात आयोजित करण्यात आलेल्या मराठा चेंबर्स ऑफ कॉमर्स एज्यु फेस्ट -२०२२ कार्यक्रमात चंद्रकांत पाटील बोलत होते.
पाच एकर क्षेत्रावर हे संशोधन केंद्र उभारण्यात येणार असून, यासाठी उद्योग क्षेत्रातील व्यक्तींनी पुढे यावे असे आवाहनही पाटील यांनी यावेळी केली.
चंद्रकांत पाटील म्हणाले, शिक्षण संस्था आणि उद्योग क्षेत्र यांच्या समन्वयाने शिक्षण देण्याचा प्रयत्न आहे. शिक्षण संस्थांनी विद्यार्थ्यांना औद्योगिक क्षेत्रातील कामाची माहिती दिली पाहिजे. त्यांना रोजच्या जीवनात उपयोगी पडणारे शिक्षण द्यायला हवे, असेही चंद्रकांत पाटील म्हणाले.
दरम्यान, यावेळी पुणे हे शिक्षणाबरोबर औद्योगिकदृष्ट्या महत्वाचे केंद्र आहे. एज्यु फेस्ट -२०२२ या कार्यक्रमात सुमारे २१ कंपन्यांनी सहभाग घेतला होता. शैक्षणिक संस्थानी वेगवेगळ्या कंपनीमध्ये विद्यार्थ्यांची सहल आयोजित करावी, असे आवाहन मराठा चेंबर ऑफ कॉमर्सचे महासंचालक डॉ. प्रशांत गिरबने यांनी केले आहे.
