अमरावती : अमरावतीमधून एका भीषण अपघाताची बातमी समोर आली आहे. नदीपात्रात ऑटो पलटी होऊन झालेल्या या दुर्घटमध्ये एका प्रवाशाचा मृत्यू झाला असुन 14 प्रवासी जखमी झाले असल्याची माहिती मिळत आहे. जखमी प्रवाशांना उपचारासाठी स्थानिकांच्या मदतीनं रुग्णालयात दाखल करण्यात आलं आहे. दर्यापूरच्या रामगाव परिसरात हा ऑटो नदी पात्रात कोसळला आहे.
याबाबत अधिक माहिती अशी की, जिल्ह्यातील दर्यापूर येथून बाजार करून रामगाव मार्गे कोळंबीला जात असताना तीन चाकी ऑटो रामगाव येथील चंद्रभागा नदी पात्रात पलटी झाला. या ऑटोमधून एकूण 15 प्रवासी प्रवास करत होते. या घटनेत सर्व प्रवासी गंभीर जखमी झाले असून त्यांना तातडीनं उपचारासाठी स्थानिकांच्या मदतीनं जवळच्या रुग्णालयात दाखल करण्यात आलं आहे. मात्र उपचार सुरू असताना जखमींपैकी एका वृद्धाचा मृत्यू झाला आहे. सुखदेव इंगळे (वय ७० वर्ष) असं या मृत्यू झालेल्या व्यक्तीचं नाव आहे.
चालकाचं नियंत्रण सुटून हा अपघात झाल्याची प्राथमिक माहिती समोर येत आहे. दरम्यान अपघातस्थळी नागरिकांनी मोठ्याप्रमाणात गर्दी केली होती. नदी पात्रावरील पुलाला संरक्षण भिंत नसल्यामुळे हा भीषण अपघात घडल्याचा आरोप ग्रामस्थांकडून केला जात आहे. या अपघाताच पुढील तपास खल्लार पोलीस करत आहेत.
