आर्णी : घराच्या भिंतीवर डोके आपटून तरुणाचा खून करण्यात आल्याची धक्कादायक घटना समोर आली आहे. ही घटना रविवारी(१५ सप्टेंबर) रात्री ८:४५ वाजताच्या सुमारास दाभडी रोडवरील संभाजीनगरमध्ये घडली आहे. बादल केशव टाले (२१) असे खून झालेल्या तरुणाचे नाव आहे. या प्रकरणी दोन तरुणांना ताब्यात घेण्यात आले आहे.
मिळालेल्या माहितीनुसार, बादल टाले व घराजवळच राहणाऱ्या दोन तरुणांमध्ये शेळी बांधण्यावरून दुपारी वाद झाला होता. रात्री संभाजीनगरातील गणेश मंडळाजवळ अन्नदानाचा कार्यक्रम सुरू असताना त्यांच्यातील हा वाद टोकाला गेला. बादल याला दोघांनी घराजवळ असलेल्या बोळीत नेत, त्या ठिकाणी त्याचे एकाने भिंतीवर खूप वेळा डोके आपटले तर, दुसऱ्याने मारहाण केली.
या मारहाणीत गंभीर होऊन, बादल या तरुणाचा जागीच मृत्यू झाला. घटनेची माहिती मिळताच आर्णी पोलिस घटनास्थळी दाखल झाले. त्यांनी आकाश दोडफोडे व कन्हैया वाघमारे (रा. संभाजीनगर, आर्णी) या तरुणांना ताब्यात घेतले. पुढील तपास पोलीस करत आहेत.
