चंद्रपूर : विदर्भात गेले काही दिवस झाले मुसळधार मुसळधार पावसाने धुमाकूळ घातला आहे. या मुसळधार पावसामुळे विद्युत तार शेतात तुटून पडली होती. याकडे कोणाचेही लक्ष नव्हते. अशात शेतात काम करण्यासाठी गेलेल्या चार शेतकऱ्यांना विजेचा जोरदार झटका बसला आणि त्यात त्यांचा मृत्यू झाल्याची घटना समोर आली आहे. या घटनेमुळं परिसरात खळबळ उडाली असून परिसरात हळहळ व्यक्त केली जात आहे.
मिळालेल्या माहितीनुसार, चंद्रपूरच्या ब्रह्मपुरी तालुक्यातील गणेशपुर गावाच्या शेतशिवारात सदरची दुर्दैवी घटना आज सकाळच्या सुमारास घडली आहे. जिल्ह्यात मागील दोन-तीन दिवसांपासून जोरदार पाऊस सुरु होता. दरम्यान, आज उघडीप असल्याने अनेक शेतकरी शेतात कामासाठी गेले होते. याच वेळी शेतात काम करीत असताना पुंडलिक मानकर, प्रकाश राऊत, युवराज डोंगरे व नानाजी राऊत या चार शेतकऱ्यांना तुटलेल्या विद्युत तारेला स्पर्श होऊन विजेचा जोरदार झटका बसला. यात त्यांचा जागीच मृत्यू झाल्याची घटना घडली आहे.
