लोणी काळभोर : पुणे जिल्ह्यात गेल्या 15 वर्षांपासून इंधनचोरी करून धुमाकूळ घालणाऱ्या लोणी काळभोर (ता. हवेली) येथील इंधन माफिया टोळीचा प्रमुख प्रविण मडीखांबेसह त्याच्या 7 साथीदारांना जून महिन्यात तडीपार करण्यात आले होते. त्यामुळे इंधन चोरीला आता तरी आळा बसेल, अशी नागरिकांना अपेक्षा होती. मात्र, त्याच्याच मार्गदर्शनाखाली इंधन माफिया लोणी काळभोर परिसरात पुन्हा सक्रीय असल्याचे उघडकीस आले आहे. हडपसर विभागाच्या सहाय्यक पोलीस आयुक्त अश्विनी राख यांच्या आदेशान्वये लोणी काळभोर व मुंढवा पोलिसांनी कुंजीरवाडी (ता. हवेली) ग्रामपंचायत हद्दीतील थेऊरफाटा परिसरात मंगळवारी (ता.10) दुपारी तीन वाजण्याच्या सुमारास छापा टाकून इंधनचोरीचे रॅकेट उद्ध्वस्त केले आहे. या कारवाईत पोलिसांनी 6 जणांना अटक केली आहे. तर 3 टँकर, 2 आयशर, 1 कार अशी सहा वाहने व 1800 लिटर इंधन असा 48 लाख रुपयांचा मुद्देमाल जप्त केला आहे.
शुभम सुशील भगत (वय 23, धंदा ड्रायव्हर, रा. बोरकरवस्ती. थेऊरफाटा, ता. हवेली जि. पुणे), तृशांत राजेंद्र सुंभे (वय 31 धंदा शेती रा. बँक ऑफ बडोदाजवळ, थेऊरफाटा ता. हवेली जि. पुणे), रवी केवट (वय 25, धंदा मजुरी रा. बोरकरवस्ती, माळीमळा ता. हवेली जि. पुणे), विशाल सुरेश गोसावी (वय 30, रा वाणीमळा थेजुर फाटा ता. हवेली जि. पुणे), किरण हरिभाऊ आंबेकर (वय 31, धंदा ड्रायव्हर रा. कदमवाकवस्ती ता. हवेली जि. पुणे) व रोहीत कुमार (वय-21, मजुरी रा. बोरकरवस्ती माळीमळा ता. हवेली जि. पुणे) अशी अटक करण्यात आलेल्या इंधनमाफियांची नावे आहेत. याप्रकरणी पोलीस अंमलदार मल्हारी शिवाजी ढमढेरे यांनी सरकारच्या वतीने लोणी काळभोर पोलीस ठाण्यात फिर्याद दिली आहे.
लोणी काळभोर पोलिसांनी दिलेल्या माहितीनुसार, हडपसर विभागाच्या सहाय्यक पोलीस आयुक्त अश्विनी राख यांच्या आदेशान्वये लोणी काळभोर व मुंढवा पोलिस हे लोणी काळभोर पोलीस ठाण्याच्या हद्दीत पेट्रोल-डिझेल चोरीचे गुन्हे रोखण्यासाठी मंगळवारी (ता. 10) गस्त घालत होते. गस्त घालत असताना, लोणी काळभोर (ता. हवेली) येथील हिंदुस्थान पेट्रोलियम व इंडियन ऑईल कंपनीमध्ये पेट्रोल व डिझेल भरून टँकर पेट्रोल पंपाकडे जात असतात.
दरम्यान, कंपनीकडून टँकर प्रवास करण्याचा मार्ग, वेळ नियोजित केलेली असते. तसेच सदर टँकर कंपनीच्या बाहेर गेल्यानंतर इंधन काढता येवू नये, याकरीता टँकरला कंपनीतच लॉक करुन पाठविले जाते. असे असताना देखील कुंजीरवाडी (ता. हवेली) ग्रामपंचायत हद्दीतील थेऊर फाट्याजवळ असलेल्या तुकाराम धुमाळ यांच्या घराच्या पाठीमागे, रिकाम्या जागेत पत्र्याच्या शेडजवळ टँकर नेऊन त्यातील पेट्रोल-डिझेलची चोरी मोठ्या प्रमाणात केली जात असल्याची खात्रीशीर माहिती पोलिसांना एका खबऱ्यामार्फत मिळाली. मिळालेल्या माहितीच्या अनुषंगाने पोलिसांनी त्या ठिकाणी सापळा रचला.
तेव्हा पोलिसांना त्या ठिकाणी शेडजवळ असलेल्या रिकाम्या जागेत एकुण तीन टँकर उभे असल्याचे दिसून आले. त्यापैकी एक हिंदुस्थान पेट्रोलियम व दुसरा इंडियन ऑईल कंपनीचा, तर तिसऱ्या टँकरवर कंपनीचे नाव नव्हते. थोड्या वेळाने त्याठिकाणी धुमाळ मळ्याकडून एक झेन कंपनीची चारचाकी गाडी टँकरजवळ आली. त्या गाडीतून एक इसम खाली उतरला. त्याने पाईप जोडलेली एक इलेक्ट्रिक मोटार बाहेर काढली. त्याला आडोसा करण्यासाठी दोन मोठे आयशर ट्रक पेट्रोल काढताना दिसणार नाही, अशा स्थितीत आणून उभे केले. सदर इसम टँकरमधून इलेक्ट्रिक मोटार व पाईपव्दारे डिझेल चोरी करुन एका प्लास्टिकच्या बॅरलमध्ये काढताना आढळून आला. पोलिसांनी या कारवाईत सहा जणांना अटक केली आहे.
पोलिसांनी या छाप्यात 1620 लीटर डिझेल (अंदाजे 1 लाख 45 हजार), 3 टँकर (प्रत्येकी 10 लाख प्रमाणे), 2 आयशर (प्रत्येकी 8 लाख रुपये प्रमाणे), 50 हजार रुपये किंमतीची 1 कार व साहित्य असा 48 लाख रुपयांचा मुद्देमाल जप्त केला आहे. आरोपींनी डिझेल या सरकारी मालाचा अपहार व चोरी केली आहे. आरोपींनी डिझेल या अत्यावश्यक व ज्वलनशील पदार्थाचा हयगयीने साठा करुन ते डिझेल लोकांना काळ्या बाजाराने विक्री केले आहे. त्यामुळे आरोपींवर लोणी काळभोर पोलीस ठाण्यात स्फोटक पदार्थ अधिनियम व विविध गंभीर कलमान्वये गुन्हा दाखल करण्यात आला आहे.
दरम्यान, पोलिसांनी वरील सहाही आरोपींना ताब्यात घेऊन अधिक चौकशी केली असता, आरोपींनी इंधन चोरी करत असून ते गावातील लोकांना विकून पैसे कमावतात. तसेच सदर पेट्रोल चोरीचा अड्डा श्रीकांत ऊर्फ सोन्या राजेंद्र सुबे यांच्या मालकीचा असल्याचे सांगून प्रविण सिद्राम मडीखांबे (रा. संभाजीनगर, कदमवाकवस्ती, ता. हवेली, जि. पुणे) आणि त्याचे इतर साथीदार पेट्रोल चोरीमध्ये मार्गदर्शन व मदत करत आहे. सदर पेट्रोलचे टँकर इंधन माफिया प्रविण मडीखांबे व त्याच्या साथीदारांच्या मदतीने विक्री करुन त्याचा मोबदला आपआपसात वाटुन घेत असल्याची कबुली आरोपींनी पोलिसांना दिली आहे.
ही कामगिरी हडपसर विभागाच्या सहाय्यक पोलीस आयुक्त अश्विनी राख यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक राजेंद्र करणकोट, मुंढवा पोलीस ठाण्याचे सहाय्यक पोलीस निरीक्षक राजु महानोर, लोणी काळभोर गुन्हे शाखेचे प्रमुख पोलीस उप निरीक्षक अमोल घोडके, पोलीस हवालदार रामहरी वणवे, पोलीस अंमलदार संदीप धुमाळ, बाजीराव विर, योगेश पाटील व मल्हारी ढमढेरे यांच्या पथकाने केली आहे.
