छत्रपती संभाजीनगर : विमानातून प्रवास करत असताना एका नामांकित कंपनीच्या मॅनेजरने समोर बसलेल्या एका डॉक्टर महिलेचा विनयभंग केल्याची घटना घडली आहे. या आरोपीने महिलेच्या अंगातील शर्ट वर करून तिच्या कंबरेला हात लावत अश्लील चाळे करत विनयभंग केला. ही घटना सोमवारी (दि. 2) सांयकाळी सव्वासहा ते साडे सहा वाजण्याच्या सुमारास इंडिगो विमानात घडली आहे.
आसिफ खान अन्वरखान अहमद (वय-39, रा. उत्तरपूर्वी, दिल्ली) असे आरोपी मॅनेजरचे नाव आहे. त्याला ताब्यात घेत चौकशी करुन नोटीस दिल्याची माहिती पोलिसांनी दिली आहे. या प्रकरणात 55 वर्षीय महिलेने फिर्याद दिली आहे.
पोलिसांनी दिलेल्या माहितीनुसार, पीडिता ही एका रुग्णालयामध्ये डॉक्टर आहे. तर आरोपी आसिफ खान हा गिब्स कंपनीत मॅनेजर आहे. दोघेही दिल्लीहून छत्रपती संभाजीनगरकडे इंडिगो विमानात प्रवास करत होते. डॉक्टर महिला समोरच्या सीटवर तर आरोपी मॅनेजर मागच्या सीटवर बसलेला होता. विमान संभाजीनगर विमानतळावर उतरण्याआधी आरोपीने संधी साधत पीडित डॉक्टरचा शर्ट पाठीमागून वर केला व हात घालून कमरेला हात लावून अश्लील चाळे केले.
दरम्यान, विमान छत्रपती संभाजीनगर विमानतळावर उतरताच पीडित डॉक्टरने पोलीस ठाणे गाठत तक्रार दाखल केली. पीडितेने दिलेल्या तक्रारीवरुन आरोपी मॅनेजर आसिफ खान याच्या विरोधात एमआयडीसी सिडको पोलीस ठाण्यात गुन्हा दाखल करून आरोपी मॅनेजरला पोलिसांनी ताब्यात घेत नोटीस बजावली आहे. पुढील तपास पोलीस करत आहेत.
