संतोष पवार
पळसदेव, (पुणे) : सावित्रीबाई फुले पुणे विद्यापीठाच्या सेट विभागातर्फे घेण्यात आलेल्या सहाय्यक प्राध्यापक पात्रता परीक्षेचा (सेट) निकाल जाहीर करण्यात आला आहे. सोमवारी संध्याकाळी ५ वाजता हा निकाल विद्यापीठाच्या https://setexam.unipune.ac.in या संकेतस्थळावर जाहीर करण्यात आला. परीक्षेत ७२७३ वि‌द्यार्थ्यांनी पात्र ठरले असून परीक्षेचा निकाल ६.६६ टक्के लागला आहे.
सावित्रीबाई फुले पुणे वि‌द्यापीठातील सेट विभागाच्या वतीने ७ एप्रिल रोजी १७ शहरांमधील विविध महावि‌द्यालयात ३९ व्या सेट परीक्षेचे आयोजन करण्यात आले होते. या परीक्षेत महाराष्ट्र आणि गोव्यातील १ लाख ९ हजार २५० विद्यार्थी सहभागी झाले होते. सेट विभागातर्फे या परीक्षेची अंतिम उत्तरतालिका विद्यार्थ्यांना उपलब्ध करून देण्यात येणार आहे. तसेच उत्तीर्ण विद्यार्थ्यांना लगेचच त्यांचे सेट प्रमाणपत्र वरील संकेतस्थळावरून डाऊनलोड करता येणार आहे.
सेट परीक्षेचा निकाल जाहीर करताना त्यासाठी मराठा आरक्षण लागू करावे किंवा करू नये, याबाबत विद्यापीठातर्फे शासन स्तरावर विद्यापीठाकडून पाठपुरावा केला जात होता. मात्र, त्याचे उत्तर प्राप्त होण्यास उशीर झाला. त्यामुळे सेट परीक्षेचा निकाल जाहीर करण्यास विलंब झाला.
असा पहा निकाल ?
- महाराष्ट्र सेट परीक्षेचा निकाल पाहण्यासाठी https://setexam.unipune.ac.in/Result.aspx या वेबसाईटला भेट द्या.
- परीक्षेची तारीख आणि वर्ष निवडा
- परीक्षा क्रमांक, नाव, जन्म दिनांक आणि मोबाईल क्रमांक नोंदवा
- यानंतर सबमिट करा, तुम्हाला तुमचा निकाल उपलब्ध होईल.
