पुणे: गेले काही दिवस महाराष्ट्राच्या वातावरणात (Weather Update) मोठे बदल दिसून येत आहेत. अरबी समुद्रातील कमी दाबाचा पट्टा आणि परतीच्या पावसामुळे निर्माण झालेले पावसाळी वातावरण आता पूर्णपणे निवळले असून, राज्यात पुन्हा एकदा थंडीची चाहूल लागली आहे. भारतीय हवामान विभागाने (IMD) दिलेल्या माहितीनुसार, राज्याच्या अनेक भागांमध्ये किमान तापमानाचा पारा लक्षणीयरीत्या घसरला आहे.
- मध्य महाराष्ट्र आणि विदर्भ: या भागांमध्ये थंडीचा जोर वाढू लागला आहे. नाशिक येथे किमान तापमान १३.४ अंश सेल्सिअस तर जळगावमध्ये १० अंश सेल्सिअस पर्यंत खाली आले आहे. विदर्भात थंडीचा प्रभाव वाढत असून अनेक ठिकाणी धुक्याचे प्रमाण देखील वाढले आहे.
- मुंबईतील स्थिती: मुंबई शहर आणि उपनगरातही कमाल आणि किमान तापमानात घट झाली आहे. पहाटेच्या वेळी गारवा अनुभवण्यास मिळत आहे. कुलाबा केंद्रात २३.५ अंश सेल्सिअस, तर सांताक्रूझ केंद्रात २१.२ अंश सेल्सिअस किमान तापमानाची नोंद झाली आहे. मात्र, ‘गुलाबी थंडी’ची प्रतीक्षा अजूनही कायम आहे.
- मराठवाडा: बीड, परभणीसह मराठवाड्यातही किमान तापमानात घट होऊन गारठा जाणवू लागला आहे.
- पुणेकरांसाठी दिलासा: पुणे (Pune) शहरात आज (रविवार, ९ नोव्हेंबर २०२५) गुलाबी थंडी वाढली आहे. हवामान विभागाच्या अंदाजानुसार, पुण्यातील किमान तापमान १५ अंश सेल्सिअस पर्यंत खाली येण्याची शक्यता आहे.
पावसाचे सावट दूर: गेल्या आठवड्यापर्यंत राज्यात अनेक ठिकाणी अवकाळी पावसाचा इशारा देण्यात आला होता. मात्र, आता पावसासाठीची स्थिती निवळल्याने पुढील काही दिवस हवामान मुख्यतः कोरडे राहण्याची शक्यता आहे. यामुळे शेतकऱ्यांसह नागरिकांना दिलासा मिळाला आहे.
हवामानातील या बदलामुळे गारठा आणखी वाढण्याची शक्यता आहे. थंडी टप्प्याटप्प्याने वाढणार, असा अंदाज हवामान विभागाने व्यक्त केला आहे. त्यामुळे नागरिकांनी काळजी घ्यावी आणि आवश्यक ती खबरदारी घ्यावी.
