1 एप्रिल 2019 पूर्वी नोंदणीकृत सर्व वाहनांसाठी हाय सिक्युरिटी रजिस्ट्रेशन प्लेट (HSRP) लावणे बंधनकारक करण्यात आले आहे. ही प्लेट बसविण्याची अंतिम मुदत पूर्वी 1 एप्रिल होती, मात्र मुदतवाढ देऊन ती 15 ऑगस्ट 2025 करण्यात आली होती. या तारखेपर्यंत नंबर प्लेट बसवली नाही तर मोटर वाहन कायदा 1988 नुसार 1000 रुपयांचा दंड आकारला जाणार आहे, अशी माहिती परिवहन विभागाकडून देण्यात आली आहे.
HSRP ही अॅल्युमिनियमची बनविलेली विशेष नंबर प्लेट असून त्यावर युनिक लेसर-कोरलेला 10 अंकी पिन, होलोग्राम व रेट्रो-रिफ्लेक्टिव्ह फिल्म असते. ही प्लेट बनावट तयार करणे अवघड असल्याने वाहन चोरी व फसवणूक रोखण्यासाठी ती उपयुक्त ठरते.
सायबर फसवणुकीची वाढ
नवीन नंबर प्लेट लावताना काहीजण बनावट वेबसाईट व फसव्या संदेशांना बळी पडत आहेत. अशाच प्रकारात भंडारा जिल्ह्यातील एका प्राध्यापिकेची 1000 रुपयांची फसवणूक झाली. गुगलवर शोध घेताना त्यांनी एका फसव्या वेबसाईटवरून नोंदणी केली, शुल्क भरले, मात्र पावती वा प्लेट बसविण्याची तारीख मिळाली नाही. नंतर अधिकृत वेबसाईटवरून केवळ 531 रुपयांत त्यांनी योग्य प्लेट मिळवली.
नागपूरचे सायबर गुन्हे शाखेचे पोलीस उपायुक्त लोहित मतानी यांनी सांगितले की, व्हॉट्सअपवर किंवा गुगलवर दिसणाऱ्या अनोळखी लिंकवरून नोंदणी करू नये. तिसऱ्या व्यक्तीद्वारे किंवा दलालामार्फत न जाता थेट शासकीय वेबसाईटवरूनच नोंदणी करावी.
अधिकृत प्रक्रिया
HSRP साठी नोंदणी करताना फक्त अधिकृत शासकीय वेबसाईट https://transport.maharashtra.gov.in वापरावी. ‘gov.in’ असा शेवट असलेली वेबसाईट हीच अधिकृत असते.
-वेबसाईटवर HSRP पर्यायावर क्लिक करून आपल्या वाहनाच्या आरसीवरील माहिती भरावी.
-दुचाकींसाठी शुल्क 450 रुपये + 18% जीएसटी (एकूण 531 रुपये) आहे.
-चारचाकी, जड व तीनचाकी वाहनांसाठीही शासनाने निश्चित शुल्क आहे.
-शुल्क भरल्यानंतर ओटीपीद्वारे पुष्टी करून होम डिलिव्हरी किंवा सेंटरवर बसविण्याचा पर्याय निवडावा.
-नंतर बसविण्याची तारीख व पावती मिळते.
ऑनलाईन अडचण आल्यास परिवहन विभागाच्या हेल्प डेस्कवर जाऊन नोंदणी करता येते. मात्र दलालांकडून होणाऱ्या फसवणुकीपासून बचावासाठी थेट विभागाशी संपर्क साधण्याचे आवाहन अधिकारी करत आहेत.
