सोलापूर: सोलापूर जिल्ह्यातील सांगोला तालुक्यातून एक अत्यंत दुःखद बातमी समोर आली आहे. आपल्या जिद्दीपुढे आणि हट्टापायी २० वर्षांच्या एका तरुणाने स्वतःचे आयुष्य संपवल्याची धक्कादायक घटना घडली आहे. प्रयांश पोपट कोकरे असे या मृत तरुणाचे नाव आहे. या घटनेमुळे परिसरात मोठी हळहळ व्यक्त केली जात आहे.
मिळालेल्या माहितीनुसार, प्रयांशला मोबाईल फोनचे गंभीर व्यसन जडले होते. दिवसभर मोबाईलमध्ये मग्न राहिल्यामुळे त्याचा स्वभाव अतिशय चिडचिडा झाला होता. गेल्या १५ दिवसांपासून त्याने वडिलांकडे एक महागडी आणि अलिशान कार घेऊन देण्याचा हट्ट धरला होता. या कारसाठी तो घरच्यांशी वारंवार वाद घालत असे. सोमवारी रात्रीही त्याने कारवरून पालकांशी कडाक्याचे भांडण केले होते.
मंगळवारी सकाळी पुन्हा एकदा त्याने गाडीच्या हट्टासाठी घरात मोठा गदारोळ केला. आई-वडिलांनी त्याला शांत करण्याचा आणि समजावण्याचा खूप प्रयत्न केला, परंतु तो कोणाचेही ऐकण्याच्या मनस्थितीत नव्हता. रागाच्या भरात आणि निराशेपोटी त्याने सकाळी ११:३० च्या सुमारास घरातील किचनमध्ये जाऊन गळफास लावून घेतला.
किचनमध्ये मुलाला त्या अवस्थेत पाहून कुटुंबीयांच्या पायाखालची जमीनच सरकली. त्यांनी तातडीने त्याला खाली उतरवून उपचारासाठी जवळच्या ग्रामीण रुग्णालयात नेले, मात्र डॉक्टरांनी तपासणी केल्यानंतर त्याला मृत घोषित केले. या घटनेने कोकरे कुटुंबावर दुःखाचा डोंगर कोसळला आहे.
